Bhubaneswar, Rymphang:
Ki kali kiba bun kiba don kumba 20.4 lak tylli, kiba la rim da kumba 15 snem kin sa shah pynduh noh ha Odisha, la ong ka Myntri jong ka Commerce and Transport ka Tukuni Sahu ha ka ïingdorbar.
Ha ka jingai jubab halor ka jingbuh jingkylli jong ka MLA jong ka seng BJP ka Kusum Tete, ka Myntri ka tnat Transport ka la ong ba ka sorkar jylla ka la rai ban khang noh ha ka ban pyndonkam ïa kine ki kali ha kaba kin ym lah ban treikam shuh naduh ka 15 tarik, Lber, 2023, katkum ka jingtreikam jong ka Registered Vehicle Scrapping Facility Policy 2022.
Napdeng kine ki kali ki la don kumba 13 lak tylli ki Motorcycle/Scooter, 2,37 lak tylli ki Moped, 1.54 lak tylli ki kali ba ju kit mar, 1.09 lak tylli ki kali rit, 45,157 tylli ki Tractor, 39,588 tylli ki Trailer, 37,359 tylli ki Autorickshaw, 31,298 tylli ki Mini bus, 12,369 tylli ki bos, 3,010 tylli ki traktor ba ju pyndonkam ha ka kam rep bad 2,034 ki kali Dumper.
Katkum ka jingthoh ba la phah hapoh ka ïingbishar, la ong ba ki la don kumba 80,20,200 tylli ki kali kiba ïaid ha surok jong ka jylla ki la long kiba bit ban treikam naba ki la don ïa ki syrnot kiba biang.
Ha kaba ïadei bad kane, ki kali ki bym bit shuh ban ïaid ha ki surok kiba dei jong ka sorkar kin sa shah pynduh noh ha ka bynta kaba nyngkong jong ka jingpyntreikam bad ki kali jong ki riewshimet kiba la treikam kumba 15 snem kin sa shah pynduh kham hadien.
Ka sorkar jylla ka la bthah ïa baroh ki tnat ba ki la dei ban pynduh noh ïa ki kali sorkar kiba la rim bad treikam slem da kumba 15 snem ha ka 31 tarik, Lber.
Hadien ba la dep ban pynduh ïa kine ki kali, ki tnat kin sa hap ban wan rah ka jingthoh ban pynshisha da ki heh ka RTO.
Ka Odisha ka la don kumba 16,369 tylli ki kali sorkar kiba la 15 snem, 300 tylli ki kali kiba la palat ïa ka 15 snem bad hapoh jong ka 20 snem bad 263 tylli ki kali kiba la 20 snem.
