Hong Kong, Rymphang:
Hadien 945 sngi ba la pyntreikam ia ka hukum ba hap ban deng beit ia ka ‘Mask’ lane jingda khmut bad shyntur naduh ba sdang wan jia ka khlam Covid-19, ki bor pyniaid ka Hong Kong ha kane ka por ki la pynbna ba ym donkam shuh ban deng ia ki mask kumba long baroh shi katta hapoh ki jaka paidbah bad kane ka la sdang ban treikam naduh ka Sngi Balang. Kane ka long ruh hadien kumba 3 snem ba ka khlam Covid ka la wan lynshop ia ki ri bapher jong ka pyrthei bad ka la pyntroiñ ruh ia ka ioh ka kot bad ka jing-long jingman jong baroh ki ri, khamtam kito ki ri kiba dang duna bad ki bym pat da bit- da biang.
Katei ka rai jong ka Hong Kong ha kane ka kynti, ka long ruh ha kane ka por ba ka sorkar ka dang kwah ban khring ia ki nongjngoh kai pyrthei ba kin leit ban rung bad leitkai sngewbha sha Hong Kong kumba la long ha ki por ba la leit, khnang ban kyntiew biang ia ka ioh ka kot baroh kawei lyngba jong ka kam jngoh kai ruh kaba long u bud lum uba ai jingkyrshan ia ka ioh ka kot.
Kumta ruh ki nongialam ka Hong Kong ha ka Sngi Ba-ar, ki la iathuh ba ka Sorkar Hong Kong ka la dep ban weng bad pynsangeh treikam ia katto katne ki kyndon ‘Protocols’ naduh kaba sdang jong une u snem 2023 hi bad kumta ruh ha kane ka por, la rai ban weng noh syndon ia katei kawei ka kyndon bad la pyllait ia ki paidbah na ka jingshah teh- shah khum jong ka ‘Mask’.
La ong ba naduh u Naitung jong u snem 2020, ka sorkar ka la pynmih ia ki jingbthah bad jingmaham bad lada ki paidbah kiba leit sha ki jaka paidbah, kim deng ia ki mask, kin shah diañ kuna haduh kumba HK$ 10,000 lane ($1,275) lada ki pynkheiñ ia katei ka jingbthah ba la buh.
Ka Hong Kong ka long kawei na ki jaka ha ka pyrthei baroh kawei, ka ban weng noh ia ka jingdeng mask. Ha kawei ka liang pat la ong ba ka mask ka long kaba donkam wat ha ki por ba kilan met (exercise). Hynrei katei ka rai jong ka Hong Kong ha kane ka por, ka long ban khring ia ki nongleit- nongwan bad ki nongjngoh kai pyrthei ba kin sngewtynnad ban leit kai bad leit rung biang sha Hong Kong hadien ki 3 snem ba la khang pyrshah ia kiba na bar ban leit ban wan sha Hong Kong kum shi bynta ban iada bad ban tehlakam ia ka jingpur bad jingsaphriang kulmar jong ka khlam Covid-19.
Namar la ong ba ka jingdon jong ki nongleit jngoh kai sha Hong Kong, ka dang hiar bha wat haduh kine ki sngi. Ha u Kyllalyngkot, ka jingdon jong ki nongleit- nongwan bad ki nongjngoh kai pyrthei sha Hong Kong ka hiar kumba 3 shah ban ia kaba ju long ha ki 4 snem mynshwa. Kane ka thew ruh ia ka 77% kaba long ha Singapore.
