Shillong, Rymphang 28:
Ka Upper Shillong ka la sakhi biang ïa ka jingdheng kali mynta ka sngi ka 28 tarik naduh Sanmer haduh Umshyrpi kaba la wanrah shisha ka jingktah ïa ka leit ka wan ki paidbah sha Shillong.
Kane ka jingdheng kali ha Upper Shillong ka lah ban dei ba ki kali kiba wanphai na ki shnong jong ki konstitwensi bapher bapher hadien ba la dep thep vote ha ka 27 tarik mynta u bnai ban jied ïa ki nongmihkhmat sha ka ïingdorbar thawaiñ ka jylla. Ha kine ki khyndiat sngi ba don ka jingïalang paidbah ban ïalap ilekshon, ka surok ha Upper Shillong ka la sakhi ïa ka jingduna sahkut kali.
Kane ka jingsahkut kali ha surok bah ha Upper Shillong ka la bteng haduh janmiet namar ka poi ruh shaduh ki dong ki lad shaduh Lummawbah naba kiba bun ki kali ki la ïaid na kane ka surok shnong ban poi ha Umshyrpi.
La ïohi ruh ba kane ka jingdheng kali ka la poi haduh khmat Civil Hospital Shillong bad shaduh Garikhana katba ka surok naduh IGP haduh Khyndailad kam don jingdheng kali eiei.
Haba ïakren bad katto katne ki nongñiah kali ki la ïathuh ba ka daw ka jingsahkut kali ka dei beit ka jingsahteng ka jingshna ïa ka surok four lane naduh Umshyrpi sha Hynñiewmer kaba la ïaid mynta la jan dap shi snem eiei.
Nangta ki la pynpaw ba lada kane ka surok ka dang slem ban shna, ka jingdheng kali kan dang jur ha Shillong namar ki kali ruh ki dang bun katba dang mih ki sngi.
Ki la pynpaw ka jingbynñiaw ba lada jur ka jingdheng kali haduh lai kynta kiba donkam kyrkieh ki la sahkut beit khamtam kito kiba wan na jngai kiba hap leit phai biang sha la shnong.
Namar kata, ki don ka jingkyrmen ba lada wan ka sorkar thymmai kin pyndep noh ïa kane ka surok.
