Ki paidbah ki la thep ïa ka vote jong ki ban jied ïa ki briew kiba dei ban long ki dkhot ka Ïingdorbar Thawaiñ kaba khatwei ka Jylla. Ynda la dep ban ñiew vote, baroh kan shai kdar kano ka seng saiñ pyrthei kaba ïoh kham bun ngut ki MLA. Ki paidbah mynta ki dang ap ban ïohi kano ka seng ka ban sa thaw ïa ka Sorkar kaba thymmai, bad lada ka dei ka Sorkar synrop, ka seng aïu ka ban lamkhmat ïa ka Sorkar. Ban ïoh thaw ïa ka Sorkar tang da kawei ka seng ne ka Sorkar synrop, donkam ban ïoh ïa ka jingbun paid kaba long 31 ngut ki MLA, kata palat marshiteng na ka jingdon jong ki 60 ngut ki MLA ha kane ka Jylla.
Ki paidbah ki ïakren sharum shaneng, bad kylli para maki, kaba kumno ka Sorkar ka Jylla kan ïoh. Hynrei kaba shai ka long ba ka Jylla kan ïoh ïa ka Sorkar synrop, tangba ym pat tip, ka seng aïu ka ban lamkhmat. Baroh ki seng saiñ pyrthei ki ïalap sha ki paidbah shaphang ka jingkylla ba kin sa wanrah ynda la jop, bad ki paidbah ki khmih lynti ban ïohi ïa kata ka jingkylla. Ka jingkylla kan nym wan lada ki paidbah kim pat kylla ha ka rukom pyrkhat naduh ka jingjied ïa ki briew kiba dei ban long ki dkhot ka Ïingdorbar Thawaiñ haduh ka jingkhmih lynti jingïarap na ki MLA. Ki MLA ki dei ban thaw aiñ bad ban wanrah ki mat treikam kiba bha kiba lah ban plie lad plie lynti kumno ban kyntiew ïa ka rukom im bad ka ïoh ka kot. Ki longïing baduk ki donkam ïa ka Sorkar kaba lah ban khmih lem bad tynrong ïa ka jingeh jong ki khamtam ban wanrah ka rukom treikam kaba ai jingkyrshan ïa ki la ka dei ha ka liang ka koit ka khiah, ka pule puthi bad ka kamai kajih. Ka Sorkar ka dei ban pyntikna ba ka don ka jingïaryngkat hapdeng ki khun kiba dei na ki longïing baduk bad kiba don ba em. Ki khun ki kti kiba dei na ki longïing baduk ki dei ban ïoh ban pule ha kajuh ka skul ne kolej ne skulbah kaba paw, namar bunsien ki jaka pule ba pynïaid da ka Sorkar kiba kham paw, la ju leit pule tang ki khun jong ki heh ki haiñ.
Ki nongshong shnong ki khmih lynti ban ïoh da ka Sorkar kaba synshar da ka jingkhuid bad lehhok. Ban ïoh ïa kata, ki paidbah kim dei ban shim ba ki nongmihkhmat ki dei kita ki nongai jingïarap, hynrei ki nongthaw lad na ka bynta ki nongshong kumno ban plielad ïa ki khun samla. Nangno ki nongmihkhmat kin ïoh ban ai pisa man la ka sngi ïa ki briew kiba leit pan jingïarap. Kum kane, ka dei ban duh noh lada ki paidbah ki sngewthuh ba ka Jylla ka donkam ïa ka synshar ka khadar kaba khuid, bad kaba lah ban thaw ïa ki mat treikam ban weng ïa ki jingeh jong ki paidbah.
Kumta hadien ka 2 tarik Lber, 2023, ki seng saiñ pyrthei bapher-bapher kin pyrshang ban thaw Sorkar kaba thymmai na ka bynta san snem bad ki paidbah ki ap khmih mynta ban ïohi noh ïa ka Sorkar kaba thymmai bad kaei ka seng ka ban ïalam ïa kata ka Sorkar kaba thymmai. Ka Sorkar synrop kaba thaw da bun tylli ki seng, ka dei ban pyntikna ba kita ki seng saiñ pyrthei ki dei ban thaw ïa ki mat treikam kiba long lang kumjuh (common minimum programme) na ka bynta ban pyntyllun lang ïa kijuh ki rukom treikam kiba pynmyntoi ïa ki paidbah ka Jylla bad kaba hikai ïa ki briew kumno ban ïeng ha la ki jong ki kjat lyngba ki lad kamai bapher bapher.
