Shillong, Rymphang 28:
U Vice President ka NPP Sengkmie, u Bah Prestone Tynsong, u la kob ba ka NPP kan jop beit 32 ngut ki kyrtong ha kane ka ilekshon MLA hadien ba ki paidbah ki la dep ban ai ïa ka rai ha ka 27 tarik mynta u bnai bad ka jingñiew vote kan long ha ka 2 tarik Lber, 2023.
Haba ïakren bad u Bah Prestone u la ong kumba u la kren ha man ki jingïalang ba ka NPP kan ïoh beit 32 ngut ki MLA ha kane ka ilekshon bad mynta ruh u ïeng beit ha kajuh ka nongrim.
“Kumba nga la ong ba ngin ïoh 32 ngut ki MLA ha ka 2 tarik Lber, ngan nym kylla ngan pynskhem beit ïa kane hi ka kyntien” u la ong.
Katba u Vice-President ka UDP u Bah Alantry Dkhar, u la kob ba ka UDP kan jop beit palat 30 ngut ki MLA ha kane ka ilekshon.
Haba ïakren bad u Bah Titos Chyne uba dei u President ka UDP East Khasi Hills District, u la ong ba ka UDP kan jop beit 20 ngut eiei.
Haba pyrshang ban ïakren bad u Bah Ernest Mawrie uba dei u President ka BJP um pat lah ban ai jingkheiñ namar um pat ïoh lut ïa ka jingkheiñ na ki konstitwensi, hynrei un ap beit ïa ka rai jong ki paidbah ha ka 2 tarik Lber 2023.
Haba kylli kumno ka jingïakhun ha West Shillong constituency, u la pynpaw ba u don bha ka jingkyrmen ba un jop ha kane ka ilekshon.
Katkum ka jingbatai ki lad pathai khubor na Delhi ki la ïathuh ba ha Meghalaya kan wan da ka sorkar khleh khaw lang, kaba mut ba hap ban thaw ïa ka sorkar lai ne saw tylli ki seng saiñpyrthei.
