Shillong, Rymphang 28:
Hadien ba ka jylla ka la dep ban pynlong ïa ka jingthep vote na ka bynta ka ilekshon MLA kaba la long ha ka 27 tarik u bnai Rymphang 2023, mynta ki paidbah ka jylla bad ki kyrtong kiba la mih madan ban aireng ha kane ka ilekshon ki la kwah dik dik ban tip noh sa ïa ka risol mano ban shong shuki na ki 59 tylli ki konstitwensi, ka seng aïu ka ban ïoh bun ka jingjop bad ka seng aïu ka ban long ka nongbat ïa u lakam synshar.
Ka jingpynbna ïa ki vote kan dei ha ka 2 tarik u Lber 2023 bad ha kaba ïadei bad kane ka bynta, na ka liang U Nongsaiñ Hima u la twad jingmut na ki katto katne ngut ki nongïalam jong ki seng saiñ pyrthei halor ka jingkhmih lynti jong ki ïa ka seng bad na ka liang ka seng kaba dang thymmai hapoh ka jylla kata ka Voice of the People’s Party(VPP) hapoh ka jingïalam jong u Bah Ardent Miller Basaïawmoit, u la ong ba haba ïakhun ïa kano-kano ka ilekshon, ka jingkyrmen ka long beit ban ïoh ïa ka jingjop bad ym ban shah rem.
U la ong ba u khmih lynti ba ka seng VPP kan leh bha bad kan ïoh ka jingjop ha kiba bun tylli ki konstitwensi.
Haba kylli la hato u sngewdon jingkyrmen ba kum u nongïalam ba rangbah ka seng un ïoh ïa ka jingjop na Nongkrem Constituency, na ka liang u Bah Ardent u la ong ba u kyrmen ba un ïoh beit ïa jingjop na katei ka konstitwensi.
Haba kylli pat ba lada ka seng VPP ka hap ban ïatreilang bad kiwei kiwei ki seng saiñ pyrthei ban thaw ïa ka sorkar synrop hapoh ka jylla, kan ïatreilang bad kano ka seng, u Bah Ardent u la ong ba ïa kata um pat lah ban ong ne rai, hynrei un sa peit hadien ka 2 tarik kaba dei ka sngi pynbna ïa ki vote hapoh ka jylla.
“Ngin sa ïa peit da la dep ka 2 tarik katno ngi ïoh bad kumno ngi long bad haei ngin don bad kaei ka rai ba ngin shim kan long beit hadien ka 2 tarik da ngi la tip katno ngut ngin jop,” la ong u Bah Ardent.
