New Delhi, Rymphang:
Katkum ba la ïohsngew na ki khubor khlieng-tyngab, la ong ba u Myntri kam bar ri jong ka Japan u Yoshimasa Hayashi, u lah ban nym wan poi sha ka jingialang G20 kaba la pynbeit ban long ha India.
Watla katta, ym pat lah ban pynshai tikna la un leit ne em ban iadon bynta lang ha katei ka jingialang ka ban long ha ka Sngi Thohdieng, ryngkat ka jingiadon lang jong kiwei ruh ki nong-ialam na ki ri bapher ki ban kynthup ia ka US bad ka Australia. Ia kane ka khubor la ïohsngew teng ruh na ki tnat pathai khubor jong ka Japan hi, ha kine ki khyndiat por ba la leit. Hynrei ha ka jaka jong utei u nongialam, lah ban wan bujli da uwei pat u Symbud Myntri jong ka Japan.
Kumta ruh la ong ba lada utei u Myntri kam bar ri jong ka Japan um treh ban mih na Japan ban wan sha katei ka jingialang ban long ha India, kam don jingmut ia u ban long u Myntri ki kam bar ri naba la pynshong ia u hapoh ri lajong bad phah mih pynban da kiwei ki bym dei ki trai ban leit mih bad leit kren ha katei ka jingialang. Kane ka long ruh ha kum kane ka por ba ka Japan ka pynpaw na lade hi ba ka kwah ban pynskhem bad pynkhlaiñ ia ka jingiadei bad ka sorkar jong u Narendra Modi bad ka leit jia ryngkhat ruh ha kum kane ka por ba baroh ki ri ki dang peit khmat bha ia ka China bad Russia haba iadei bad ka thma hapoh Ukraine.
Kumta la ong ba katei ka khubor ha kane ka kynti, ka la wanrah ia ka jingpyrshah na kiba bun ki Myntri thaw aiñ jong ki ri bapher, naba ka Japan ka dang pynkhreh ruh ban ialam ia ka jingialang G7 kaba heh bad ka ban sa long ha u Jymmang. Naba la ong ruh ba wat da u Myntri Rangbahduh ka ri India, u Narendra Modi, u dang leit ban iadon bynta lang bad ka Japan ha ka por ba la pyndep don burom ia u Myntri Rangbahduh ka Japan ha ki por ba la leit, u Shinzo Abe.
Shuh shuh ruh la ong ba ka Japan bad ka India ha u Kyllalyngkot, ki dang dep ban pynkilan lang ia ki tnat shipai jongki bad ka Sorkar Kishida ka dang thmu ruh ban khot ia ka Australia bad ka India sha katei ka jingialang G-7 ka ban long ha u bnai Jymmang, ban ïakren halor katto katne ki at ba kongsan naduh ka thma ha Ukraine, kumjuh ruh haba iadei bad ki kam Nuclear bad kumjuh ruh haba iadei bad ka jingkylla ka suiñ bneng ha kane ka por.
Namar kata ruh, la ong ba kane ka khubor ka la pynsniew dur noh ia ka jinglong nongialam jong ka Japan ha katei ka jingialang G-7 ka ban sa long, lada kam lah ban pyn poi ia utei u Myntri kam bar ri jongka sha katei ka jingialang G-20 ha India.
Kumta ruh ki la don ki nongialam na India kiba la ong ba katei ka rai jong ka Japan ban ym phah ia utei u Myntri Kam bar ri jongka sha katei ka jingialang kaba heh tam ban pynlong ha India, ka pyni shai ruh ba ka Japan kam kheiñ snep ia ka India, bad ba ka ñiewkor ruh tang ia katei ka jingialang G-7 kaba hap hapoh ka jinglam khmat jongka hi.
