New Delhi, Rymphang:
U Symbud Myntri Rangbah jong ka Delhi u Manish Sisodia ha ka sngi Ba-ar u la leit sha ka Supreme Court, na ka bynta ban pynibor pyrshah halor ka jingshahkem jong u bad halor ka rukom leh jong ka kynhun tohkit jong ka kynhun CBI ha kaba ïadei bad ka jingjia shah kynnoh donkti ha ka kam bamsap kaba la mih lyngba ka kyiad.
Ïa kane ka jingpynibor jong u la khmih bniah hynnin ka sngi da ka kynhun bishar.
U Sisodia u la shah-kem ha ka janmiet jong ka sngi U Blei ha kaba ïadei bad ka jingshah kynnoh donkti ha ka kam bamsap halor ka jingpyntreikam ïa ki rukom pyntreikam ba ïadei bad ka Delhi Excise Policy 2021-22 ha kaba ïa mynta la lah ban weng noh.
Ka ïingbishar kaba kyrpang ha Delhi ka la phah ïa u san sngi sha patok ban shah tohkit ha ka kynhun CBI na ka bynta ka jingshah kynnoh donkti ha ka kam bamsap.
Ka Rouse Avenue Court, ha ka por ba ka la phah ïa u Sisodia sha kti jong ka kynhun CBI, ka la hukum ba ïa ka jingtohkit ïa u nongïalam jong ka seng AAP ha ka por ba u shah set la dei ban pynlong ha ki jaka ba don ki CCTV katkum ka jingbud ïa ki kyndon ba la buh da ka Supreme Court bad la ong ba ïa kine ki Footage la dei ban pynïoh da ka kynhun CBI.
Ka ïingbishar ka la ong ba ha kaba ïadei bad kine ki jinglong jingman, uba la shah kynnoh u la shah set ha ki kti jong ka kynhun CBI na ka bynta san sngi kata haduh ka 4 tarik, Lber na ka bynta ban bteng bad ïaid shakhmat ha ka jingtohkit halor ka ka jingshah kynnoh.
