Shillong, Rymphang 28:
Ka Dorbar Mang Tyngka jong ka Khasi Hills Autonomous District Council (KHADC) kan sdang lashai ka sngi, kata 1 tarik u Lber 2023. Kane ka Dorbar Mang Tyngka kaba lai sngi kan sdang ha ka 1 tarik bad kut ha ka 3 tarik u Lber.
Watla ka tnat Legislative hapoh ka jingïalam u Chairman ka KHADC u Bah Lamphrang Blah ki la buh ban pynlong ïa ka Dorbar lai sngi, hynrei namar ba ka don ka jingñiew vote jong ka ilekshon MLA 2023 ha ka 2 tarik u Lber bad ki don haduh 19 ngut ki MDC jong ka Council kiba ïakhun ïa katei ka ilekshon, kumta lah ban pynkynriah noh ïa ka jingpynlong dorbar.
Kumta ha ka dorbar ka ban long ha ka 1 Tarik, na ka liang ki MDC kin sa shim ïa ka rai ban pynsangeh noh shwa ïa ka dorbar ha ka 2 bad 3 tarik u Lber bad yn sa pynlong noh hadien ba la dep ñiew ïa ka vote jong ka ilekshon MLA.
