Shillong, Rymphang 28:
U Bah Bindo M Lanong uba la ïakhun ïa ka ilekshon MLA na Nongkrem Konstitwensi kum u kyrtong shimet (IND), u la ong ba u dap da ka jingkyndit ban ïohi ïa ka rukom thep vote jong kiba bun ki briew ym baroh, kaba um pat ju ïohi mynno-mynno.
“Hadien ba nga la ïohi ïa ka rukom thep vote ha ki polling station ha kiba bun ki shnong hapoh ka Nongkrem Konstitwensi; kaba dei ruh ka sien nyngkong ba ngan ïakhun ha ka konstitwensi kaba la don shabar ka Shillong, nga la kyndit namar ym pat ju mlien ne ïohi mynno-mynno ïa kane ka rukom thep vote, kiba bun ym baroh ki ïa beh pisa, ki don ki bym leit thep vote wat haduh 5 baje ruh, ki ap pisa bad pan pisa na ki kyrtong,” la ong u Bah Bindo haba kren bad u nongthoh khubor.
“Wat la nga la don ka jingkyrmen ha kaba nyngkong ban poi sha ka thong, hynrei mynta nga la artatien ban ïoh ïa ka jingjop, namar kiba bun ym baroh bad wat kito kiba la ïadon bad kyrshan ïa nga ruh ki la kylla ha ka minit kaba khatduh ban ïa beh ïa ka pisa,” la ong u Bah Bindo bad bynrap ba ha kane ka konstitwensi ba la don lypa lei lei u kyrtong ba ai pisa ai tiar, la buh jingeh bakhraw.
U la ong, “Nga la ïaid ha Nongkrem Konstitwensi la shi snem tam bad ha kaba nga la leh shibun ki kam, ki jingïarap ïa ki sports club, ban ai ki jingïarap ïa ki shnong, ban ïakren kumno ban kyntiew ïa ka ïoh ka kot jong ki nongrep. Hynrei wat la nga la ai kat kita ki jingïarap lem bad ki skhim kiba bun, nga la artatien ban jop mynta, namar kiba bun ki ap ban ïoh pisa ban leit thep vote, ka la buh ha ka jingeh bad ngam tip shuh.”
U Bah Bindo u la ong, kaba kham sngewkhia ka long ba wat ki briew kiba stad kiba shemphang ruh imat kim ïakren kim ïa sneng. “Don ruh ki rangbah shnong ym baroh kiba la don naduh ba sdang bad nga, hynrei da la poi ka por ilekshon, ki la kylla bad beh pisa lang noh, te shano ngin poi, ngin sa ïoh biang ïa ki nongïalam ki ban bamsap, ki ban nym leh eiei ïa ka roi ka par ki paidbah,” u la ong.
“Da nga la ïohi ïa kane ka jingthep vote, kynsan-kynsan nga kylla ka rukom pyrkhat, namar nga la don ka jingkyrmen ban jop, hynrei kane ka kylla noh. Nga la duh jingkyrmen haba ïohi ba kiba bun ki ap pisa ilekshon, bad don ruh napdeng ki ’riewniam ym baroh, ki la kylla lang ha ka minit ba khatduh sha kajuh ka lyer jong ka jingpan pisa ban leit lang,” la ong u Bah Bindo bad bynrap “Ngam tip kaei ka ban jia bad katkum ka jingshem dang synshar hi ka bor pisa.”
“Nga duh jingkyrmen ïa ka lashai ka la shi sngi, ngin nym ïoh shuh ïa ki nongmihkhmat ba khuid ba bit ban wanrah jingsynshar ba khuid ba suba namar kine ki ban da wan kin leit ban lute na ki paidbah bad ki paidbah kin don ha ka jingjynjar bad kin nang ngam nang ngam,” la pynkut u Bah Bindo.
