Shillong, Rymphang 28:
Ka jingpynbna ïa ki vote na ka bynta ka ilekshon MLA ka la pynkyndeh shikatdei eh ïa ki paidbah ka jylla namar kan dei ka sngi ba ki paidbah ka jylla kin ïoh ïa ka sorkar kaba thymmai na ka bynta ka samoi treikam kaba 5 snem bad ka jingñiew ïa ki vote kan dei naduh ka por mynstep jong ka 2 tarik u Lber 2023.
Katei ka sngi kan dei ka sngi kaba shongshit tam bad kumjuh ruh ka ban pynsngewsih pat ïa ki katto katne ngut kiba la ïakhun ïa katei ka ilekshon.
Ha kaba ïadei bad ka jingïoh jingjop ha kane ka ilekshon, na ka liang ki seng saiñ pyrthei ka jylla ki la pynlong ka jingkheiñ jingdiah lane ka ‘Exit Poll’ ba haduh katno tylli ki shuki ba ka seng jong ki kan ïoh jingjop na ki 59 tylli ki konstitwensi. Bad na ka liang ka Bharatiya Janata Party(BJP) hapoh ka jingïalam jong u Bah Ernest Mawrie kum u State President ka seng, u la ong ba um pat ïoh satia ïa ka kaiphod namar ba ka seng ka dang ap bad um pat ïoh jingtip bha.
U Bah Ernest Mawrie ruh uba la ïakhun ïa ka ilekshon ha kane ka kynti kaba mynta na 18-West Shillong Constituency bad haba kylli la hato u don jingkyrmen ban ïoh ïa ka jingjop na katei ka konstitwensi, u Bah Ernest u la ong ba u sngew don jingkyrmen bad u sngew ka biang bha.
