Shillong, Rymphang 28:
Ki don 52, 700 ngut ki khynnah pule ki ban ïakhun ïa ka eksamin Secondary School Leaving Certificate (SSLC) ka ban pynlong da ka Meghalaya Board of School Education (MBoSE) ha ka 3 tarik u Lber, 2023.
Ki bor pynïaid ka MBoSE ki la ïathuh ba na kitei, 30, 205 ngut ki kynthup ïa ki kynthei bad 22, 495 ngut ki shynrang.
Ha kajuh ka por, haba phai sha ki jaka thoh eksam ba la pynkhreh na bynta ka SSLC, kin don 157 tylli ki jaka thoh eksam kiba saphriang ha kylleng ka Jylla.
Na kitei, kiba bun ki don ha ‘Shillong Region’ – 89 tylli katba 68 tylli kiwei pat ki hap hapoh ka ‘Tura Region’.
Ha kawei pat ka liang, ka eksamin Higher Secondary School Leaving Certificate (HSSLC) ka ban sdang ha kajuh hi ka sngi (3 tarik u Lber) kan sakhi ïa 32, 006 ngut ki khynnah pule ki ban ïakhun ïa ka eksamin.
Ha ka tnad pule ‘Science’, kin don 3684 ngut ki khynnah pule ki ban ïakhun ïa ka eksam, katba ha ka tnad pule ‘Commerce’ ki don 2405 ngut. Haba phai sha ka tnad pule ‘Arts’, ki khynnah pule ki ban ïakhun ïa ka eksamin ki don 25, 900 ngut.
Kin don ruh 106 tylli ki jaka thoh eksam ba la pynkhreh na bynta ka HSSLC ba kynthup ïa 66 tylli ha ‘Shillong Region’ bad 40 tylli ha ‘Tura Region’.
Na ka liang ki bor pynïaid ka MBoSE ki la bthah ïa ki ophisar ha man la ki jaka thoh eksam ban khmih bniah na bynta ka jingïaid beit ïaid ryntih jong ka eksamin.
Haba kylli halor ka jingduna ki khynnah pule kiba thoh ïa ka eksamin SSLC mynta u snem haba ïanujor bad u snem ba la dep, u Jt. Director ka MBoSE, Bah M. Marbaniang u la ong ba ka jinghiar ka dei na ka daw jong ka khlam COVID-19 ha kine snem ba la dep.
“Ha u snem 2021, ym shym da pyrkhing than bad kumta la pyllait lut ïa ki khynnah pule ban thoh ïa ka eksam hynrei bun ki bym shym la ‘pass’ ïa ka eksamin. Mynta, ha kawei ka liang, ka ‘Selection Test’ ruh ka long kaba bniah hashuwa ban ïoh thoh ïa ka SSLC,” u la ong.
Ki don 58, 625 ngut ki khynnah pule kiba la ïakhun ïa ka eksamin SSLC ha u snem ba la dep.
Haba kylli ïa ki lad ki lynti ba la shim da ka tnad halor ka jinghiar ka jingdon ki khynnah pule kiba ‘pass’ ha ka SSLC khamtam ha Ri-lum Garo, utei u ophisar u la ong ba ka Sorkar ka la pynbiang ïa ki prokram ai jinghikai kiba paka sha ki nonghikai bad ka don ka jingkyrmen ba ka risol jong ka eksamin kan kham bha mynta u snem.
Shuh shuh u la bynrap ba ka tnad ka la pynbiang ïa ki ‘Supervising Officer’, ki nongpeit pyrman, ki kynhun ‘Flying Squad’ na bynta ka jingïaid beit ïaid ryntih jong ki eksamin.
Haba jubab, u la ong, “Ïa ki jingkylli ngi la buh bha. La shim ïa ki shi kynta shuwa ka por ban thoh eksam bad la plied pat ïa ki 15 minit shuwa ban thoh.”
