Shillong, Rymphang 28:
U Bah Sanbor Shullai, uba dei u nongïalam ka BJP ha Meghalaya u la ong ba u don ïa ka jingkhmih lynti ba ha kane ka kynti ka BJP kan jop bun ki MLA haba ïanujor bad ka ilekshon ha u 2018.
“Katkum ka rukom pyrkhat jong ki nongïalam ka BJP, namar ka jingwan pynïasoh jong ki MLA bad ka jingdon ïa ki kyrtong kiba biang, ngi khmih lynti ba ngin jop haduh 20 ngut eiei ha kane ka ilekshon,” la ong u Bah Sanbor.
Ha kaba ïadei bad kano ka seng ka BJP kan ïatreilang ban thaw sorkar hadien ka 2 tarik, u Bah Sanbor u la ong, ki nongïalam ka seng kin sa shong pyrkhat bad kiei ki seng saiñ pyrthei kiba kloi ban ïatreilang na ka bynta ban thaw ïa ka sorkar synrop hapoh ka jylla.
“Ki nongïalam ba ha khliehduh jong ka BJP, ki nongïalam ka BJP kiba khmih ïa ka thaiñ shatei lam-mihngi bad u Myntri Rangbah ka Assam u Dr Himanta Biswa Sarma ba peit ïa ka jylla Meghalaya kin sa ïatai sani bad ki seng aïu ngin ïatreilang ban thaw ïa ka sorkar,” la ong biang u Bah Sanbor.
Ha kaba ïadei pat bad ka shuki Myntri Rangbah, u Bah Sanbor u la ong, u Bah A.L Hek um lah ban kam dalade hi ba un shimti ïa kane ka shuki, hynrei kin dei ki nongïalam ka BJP na Delhi bad khamtam u Himanta Biswa Sarma ki ban shim ïa ka rai mano ban leit shimti ïa ka shuki Myntri Rangbah.
Haba kylli hato ka BJP kan dang ïatreilang bad ka NPP, watla ki la kynthoh bad kawang ktieh mar kyllieng khamtam halor ka jingbamsap kaba wat na ka liang u Amit Shah ruh u la kren shai ba ka Meghalaya ka dei ka jylla kaba bamsap tam, u Bah Sanbor u la ong, “Ha ka ilekshon ym sngew phylla, ka ilekshon ka dei hi ka ilekshon, hynrei ha ka sorkar ngi ïatreilang ïa kaba ki paidbah ruh ki tip.
U Bah Sanbor u la kob ruh ba ha kane ka kynti un jop donburom ïa ka ilekshon na South Shillong Constituency bad kane kan dei lyngba ki kam kiba la dep ban trei bad ruh khamtam lei ka jinglah ban wanrah ïa ka shongsuk shongsaiñ hapoh ka konstitwensi.
