Aizawl, Lber:
U Myntri Rangbah jong ka jylla Mizoram, u Zoramthanga ha ka Sngi Ba-ar mynta ka taiew u la pyntip ba u Myntri ka Tnat Kam Pohïing jong ka Sorkar Pdeng – Amit Shah un sa wan ban jngoh ïa ka jylla ha une u bnai ba mynta bad un sa leit ruh ban plie paidbah ïa ka shlem trei kam ba thymmai jong ka tnat shipai Assam Rifles ha Aizawl ha ka 17 tarik mynta u bnai.
Ha ka jingïalang bad ki lad pathai khubor, na ka liang u Myntri Rangbah ka Mizoram u la pyntip ba u Amit Shah un wan ban plie paidbah ïa katei ka shlem trei kam kaba thymmai kaba la tei ha ka shnong Zokhawsang – ka shnong kaba jngai kumba 15 km na ka nongbah Aizawl.
Shuh shuh ha katei ka jingwan jngoh jong u, un sa leit ban buh maw nongrim ruh na ka bynta ban tei ïa u mot sahkynmaw na ka bynta u Myntri Rangbah barim jong ka jylla Mizoram u ba dei ruh u nongseng jong ka seng Mizo National Front (MNF) ha Laldenga’s Centre kaba don ha ka nongbah Aizawl. Hynrei ha kawei pat ka khubor, na ka liang ki bor sorkar ka tnat shipai Assam Rifles ki la ïathuh ba na ka liang ka tnat shipai kam pat shym la ïoh jingtip satia halor katei ka jingwan jngoh jong u Amit Shah ban plie paidbah ïa ka shlem treikam ba thymmai. Kum ban shu ïathuh hangne, ïa ka shlem trei kam jong ka tnat shipai Assam Rifles la rai ban pynkynriah na ka nongbah Aizawl sha ka shnong Zokhawsang. Ka jingpynkynriah ïa katei ka shlem trei kam ka tnat shipai Assam Rifles ka dei kawei na ki mat trei kam jong ka seng MNF ha ka ilekshon Ïing Dorbar Thaw Aiñ kaba la pynlong ha u Naiwieng jong u snem 2018.
Dei ha u bnai Rymphang jong u snem 2019 ba ka tnat Kam Pohïing jong ka Sorkar Pdeng ka la pynmih ïa ka hukum ban bthah ïa ka tnat shipai Assam Rifles ban pynkynriah ïa ka ‘battalion headquarters’ jong ka sha ka shnong Zokhawsang.
Kum ban shu ïathuh hangne, ka tnat shipai Assam Rifles naduh u snem 1917 ka la don ïa ka shlem trei kam jong ka ha ka shnong Zodin (Lammual) bad ha Khatla, Aizawl. Halor ki mat kiba ïadei bad ka jingpynkynriah ïa ka shlem treikam jong ka tnat shipai Assam Rifles la ïathuh ba ka sorkar jylla barim hapoh ka jingïalam jong u Laldenga ka la dawa ruh ba dei ban pynkynriah ïa katei ka shlem trei sha ka thaiñ Zokhawsang. Ka jingdawa ban pynkynriah ïa ka shlem trei kam ka mih hadien ka jingïakajia ba jur hapdeng ki bor shipai bad ki ‘riew paidbah ha kaba ki la don ruh haduh 7 ngut ki ‘riew paidbah kiba la duh ei ïa la ki jong ki jingim. Katei ka jingïakajia ka la jia ha u snem 1988.
Ha ka jingïalang bad u Amit Shah ha u Naiwieng 2022, na ka liang u Myntri Rangbah ka Mizoram u la pyntip ba ka jingpynkynriah ïa ka shlem trei kam Assam Rifles ka la sahteng na ka daw jong ka jingdon katto katne tylli ki diengpyngkiang kiba ka sorkar ka ïakynduh.
Ha ka Lah Sngi U Blei mynta ka taiew, na ka liang u Myntri ka tnat Kam Pohïing jong ka jylla Mizoram – Lalchamliana u la pyntip hapoh Ïing Dorbar Thaw Aiñ ba na ka liang ka sorkar jylla kam lah ban tip tikna lano ka tnat shipai Assam Rifles kan pynkynriah ïa ka shlem trei kam sha ka shnong Zokhawsang. U Myntri u la ïathuh ruh ba ka tnat shipai Assam Rifles ki la pynslem ïa katei ka kam da kaba ai bad pynsgew ïa bun tylli ki daw sha ka tnat Kam Pohïing jong ka Sorkar Pdeng.
U Myntri ka Mizoram u la pyntip shuh shuh ba na ka liang ka Sorkar Jylla ka la dep ban shim ïa baroh ki sienjam kiba donkam kiba ïadei bad ka jingpynkynriah ïa ka shlem Assam Rifles na Aizawl sha Zokhawsang.
