Agartala, Lber:
Ha kawei na ki jingjia kaba la pynpar ñiangkhriat ïa kiba bun ki paidbah nongshong shnong jong ka thaiñ Gomati district, Tripura la ïathuh ba uwei u rangbah u ba la 45 snem ka rta u la pom pyndkut ïa ka kti jong ka kmie jong u kaba la don kumba 75 snem ka rta. Kat kum ki jingïoh lum jingtip la ïathuh ba katei ka jingjia ka la jia na ka daw jong ka jingmih ki jingïakajia kiba ïadei bad ka pisa pilaiñ bad kumjuh ruh na ka daw jong ka jingbuaid khawiang jong utei u rangbah.
U runar u ba la donkti ha katei ka kam bymman u dei u ba la tip kyrteng kum u Bimal Ghosh bad ka kmie jong u ka dei kaba la tip kyrteng kum ka Namita Ghosh.
Kat kum ki jingïoh lum khubor la ïathuh ba ka jingïakajia hapdeng kitei ki 2 ngut shi kmie shi kun ka la jia naduh ka por mynsngi hynrei na ka liang ki nongshong shnong ba marjan kim shym la leit korbar satia namar kam dei ka jingïakajia kaba ki la ïoh sngew ha ka sien ba nyngkong. Dei tad ha ka por mynmiet hadien ba ki nongshong shnong ki la ïoh sngew ïa ka jinglynniar ba sawa jam jong katei ka longkmie ba ki la leit mar mar ban jngoh ïa ka ïing sah jong ka.
Ha ka jingleit jngoh jong ki nongshong shnong, ki la lap ïa katei ka longkmie kaba la thiah ha madan ha ryngkat ka jingphlei snam kaba jur bad shem ruh ba ka kti jong ka la sha pom dkut.
Halor katei ka jingjia, la ïathuh ba na ka liang ki nongshong shnong ki la shoh la dat ïa utei u rangbah hynrei u la ïoh phet bad lait im da ka said.
Kat kum ki jingïoh lum khubor la ïathuh ba katei ka longkmie mynta ka dang don hapdeng ka jingshah sumar ha kawei ka hospital kaba marjan.
Na ka liang ki bor pulit ka thaiñ ki la ïoh ruh ban kurup ïa ka wait kaba utei u runar u la pyndonkam ban pom ïa la ka jong ka kmie. Tad haduh ba la ïoh ïa kane ka khubor, la ïathuh ba na ka liang ki bor pulit ka thaiñ ki la pynlong ïa ka jingleit thwet kaba jur ban ïoh kem noh ïa utei u runar u ba la donkti ha katei ka kam bymman.
