Shillong, Lber 01:
Katba ki paidbah ki dang ap ïa ka jingñiew vote na ka bynta ban tip ïa ki nongjop, ka jingkylli kaba hakhmat eh ka long, kaei ka seng ka ban ïoh bun eh ki MLA ynda la dep lut ka jingñiew vote.
Ki paidbah ki la ïakren bad buh jingkylli ruh, kaei ka seng ka ban ïalam ïa ka Sorkar ka bathymmai bad kata ka seng kan thaw Sorkar lang bad kino ki seng?
Ki nongïalam ka BJP ki la kop lypa ba kan ïalam ïa ka Sorkar ha kane ka kynti, ha kaba u nongïalam ka BJP uba dei ruh u Myntri Rangbah ka Assam, u Himanta Biswa Sarma u la kren shai ba ha ka ilekshon 2018, ka BJP ka la rai ban thaw Sorkar lang bad ka NPP na ka daw ba kam kwah ïa ka Congress ban don ha ka bor, hynrei ha kane ka kynti, u Myntri Rangbah jong ka Sorkar kaba thymmai un dei hi na ka BJP.
U la ong ruh ba ka BJP ha kane ka kynti kan dei ka pali jong ka ban peit ba kan ïeng ha la ki jong ki kjat jong ka hi ban thaw ïa ka Sorkar.
Na ki dak ki shin, ka pyni ba yn ym don kano kano ka seng saiñ pyrthei kaba lah ban ïoh tang marwei hi haba ïadei bad ka jingbunpaid ki MLA.
Kumta, ka BJP, lehse, ka la kheiñ jingkheiñ ba lada ka jop tang 3 ne 4 ngut ki MLA ruh, kan dawa beit ba u Myntri Rangbah un dei beit na ka BJP da kaba ïatreilang bad kiwei pat ki seng kiba kloi ban thaw Sorkar lang.
Lada ka BJP ka lah ban thaw ïa ka Sorkar, kaba shai ka long ba ka Congress, kan shong sha ka Liang Pyrshah namarba kine ki seng kim lah satia ban ïatreilang da lei lei ruh. Hynrei ka jingkylli ka long, katno tylli ki seng ki ban shong sha ka Liang Pyrshah?
Kaba kham pynkhuslai ïa kiwei pat ki seng saiñ pyrthei ka long ba ïoh ba ki MLA jong ki kin shahtan noh khamakha tang hadien ba la dep ñiew vote ban ïalong lang noh kawei bad kano kano kawei pat ka seng saiñ pyrthei.
Ka National People’s Party (NPP) kaba la ïalam ïa ka Sorkar MDA ha ki san snem ba la dep (2018-2023), ka lah ban donlang biang bad ka BJP ha ka Sorkar kaba thymmai, tangba ka jingkylli ka long, hato ka NPP ka dang ïoh ban ïalam ïa ka Sorkar ne kan hap kyrshan ïa ka BJP ne ïa kiwei pat ki seng ban thaw lang ïa ka Sorkar kaba thymmai. Ym pat tip katno ngut ka BJP kan ïoh MLA ha kane ka ilekshon. Lada ka BJP kan ïalam ïa ka Sorkar kaba thymmai lehse, kan khot lang shwa ïa kiwei ki seng da ka jingthmu ban buh sha ka Liang Pyrshah ïa ka NPP, Congress bad TMC.
U Himanta, ha ka por ba u wan ïalap ilekshon na ka bynta ki kyrtong ka BJP ha nongbah Shillong, u la kren shai ba ka BJP kam kwah ban khot ïa ka TMC ban thaw Sorkar ha Meghalaya namar ha kane ka kynti, yn ïoh da u Myntri Rangbah uba dei hi na ka BJP.
Namarkata, kaei ka seng ka ban ïoh thaw ïa ka Sorkar bad kan thaw bad kino ki seng saiñ pyrthei ka dei ka jingkylli kaba yn sa tip shai ynda la tip shai katno ngut ki MLA yn ïoh da ki seng saiñ pyrthei bapher bapher.
