Shillong, Lber 01:
Ka Khasi Students’ Union (KSU) lyngba ka Education Cell ka ai khublei kitbok kitrwiang ïa baroh ki samla pule Khasi kiba shen kin sa ïakhun ïa ki eksamin SSLC bad HSSLC bad kiwei kiwei de ki eksamin bapher bapher ki jong ki ha kine ki khyndiat sngi ki ban wan. Ha kum kane ka juk kaba mynta kaba long ka juk jong ka jingïakhun ki samla ki donkam ym tang ban ïoh kheit ïa u soh ka jingjop, hynrei ban kiew ruh sha ki kliar jong ka jingjop.
Ha ka kyrwoh khubor ba la pyllait da u Vice Chairman ka Education Cell ka seng u samla S Kharbihkhiew u la ong, ka juk mynta ka dawa shibun kiei kiei na ka bynta ka jingbha bad jingmyntoi ka imlang ka sahlang. Kumta ka Education Cell ka kyntu ïa ki samla pule ban trei borbah bad minot thop khnang ba kin wan sha khmat ha ki jingpule ki jong ki.
U la ong, katba dang ïaid ki sngi bad ka por la ju sakhi ba ka jaidbynriew Khasi ka la hiar arsut ha ka liang ka pule puthi, la kham ñiar ruh ban shem ïa ki samla Khasi ba kin pass ïa ki kynja eksamin ba kham heh kum ki civil services bad kiwei kiwei. Haba peit pat ïa kiwei ki jaidbynriew, la ïohi, ba ki la nang kiew shaphrang bad kane ka long ka jingma ïa ka jaidbynriew, namar ba lada kan ïai bteng ban long kumne shen yn sa long kiba sahdien tam ha baroh ki liang namar ka jingnang jingstad ka long ka atiar kaba radbah tam ha ka ban kyntiew ban pynkhlaiñ ïa ka jaidbynriew.
