Shillong, Lber 01:
Ka Meghalaya Clean and Green Organization (MCGO) kaba dei kawei na ka seng ieid mariang hapoh ka jylla Meghalaya, ka kyntu ïa ki paidbah nongshong shnong ka jylla baroh ba kin husiar ha ka ïaid ka ïeng ban nym bret kulmar ïa ki sikret lane duma haba ki ïaid na ki jaka khlaw ïoh kan wanrah ïa ki jingpluh ding.
Ha ka kyrwoh khubor ba la pyllait da u Bah S Nongkhlaw, Organising Secretary Meghalaya Clean and Green Organization uba dei ruh u President Meghalaya Clean and Green Organization, Upper Shillong Unit u la kyrpad ruh ba kin long kiba stad ban pynneh pynsah ïa ka mariang bad ki sawdong sawkun jong ka, ban nym ïa thang khlaw kulmar namar kan wanrah ïa ka jingjot jong ki khlaw ki btap, dieng ki siej bad ki mrad bad ki sim.
“Ngi im ha kane ka juk ba ka jingkylla jong ka mariang ka stet bha, (Global Warming And Climate Change), lada ngim kheiñ kor ïa ka mariang bad ngin duh ïa ki khlaw bad ki mrad bad kan poi ka por ba ngi ruh ki khun bynriew ngin sa duh jaid na kane ka sla pyrthei, kumba ka jia ïa ki mrad Dinosaur kiba la duh jaid na kane ka sla pyrthei bad sah satang ki jingkynmaw ha ki kot pule bad jingïathuh khana pateng,” la ong u Bah Nongkhlaw.
Nangta u la ong kane ka aïom ka dei ka aïom kaba tyrkhong bad jur bha ka lyer, kumta la kyrpad ruh ïa kito ki briew kiba im da kaba rep shyrti (Jhum) ba kin long kiba phikir haba ki thang ding ha la ki jaka rep.
Ha kawei pat ka liang ka MCGO ka la kyrpad ruh ïa ka Fire and Emergency Service ba kin long kiba peitngor ïa ki jingpluh khlaw, pluh ding ha ki lum bad ki khlaw, bad lada don ba jingujor ne ym don ba ujor ruh kin mareh wut wut sha ki jaka pluh ding tang shu ïohi ne ïoh jingtip.
Namar kata, ka MCGO ka kyntu ruh ïa ka sorkar ba kan shimkhia ban pynlong da ki prokram ai jingpynshai ban pynsngewthuh ïa ki paidbah halor ka jingkordor ka mariang bad ban kiar na ki jingthang khlaw.
