Nongstoiñ, Lber 01:
Ka Balang Presbyterian Nongkhlaw, Nongkhlaw Presbytery, Nongstoiñ West Khasi Hills ka la pynkhreh shaid-shaid ban pdiang ïa ka Jingïaseng Samla KJP Synod Sepngi ka ban long naduh ka 3 tarik haduh 5 tarik mynta u bnai 2023 hapoh ka Balang.
Haba kren bad ki lad pathai khubor, u Pastor GML Mawlot uba peit (in-charge) ïa ka Balang Presbyterian Nongkhlaw u la ong, na ka Balang ka la pynbeit bad pynmih ki jingai jingtip sha kiba wan jingïaseng naduh ki pastor, ki dkhot, delegates bad ki paidbah.
Ka shnong Nongkhlaw ka jngai kumba 85 kilometer eiei na Shillong, kumta kiba mih na Shillong kin ïaid ter ter sha Mairang, Nongkasen sha lad kadiang (Surok Laitkseh) bad sha kamon na lad Laitkseh sha Mawkaton, Mawshongkhyndew, Mawsnarih sha Mynni Mawbri, Jaidoh Mawthungkper (kynroh) NongKynjang ha Nongkhlaw.
Kiba mih na Mawkyrwat bad ïaid na Mawkyrwat lynti Nongstoiñ sha Rangblang, Nonglwai sha Nongkhlaw kan jngai kumba 40 km.
Nangta kiba ïaid na Nongstoiñ (kiew lynti Mawkyrwat) sha Nongjyllieh Mawthungkper (kynroh) sha Nongkynjang, sha Nongkhlaw kan jngai kumba 13 km.
Ha ka Sngi U Trai, ka 5 tarik u Lber (March) 2023 kaba dei ka jingïaseng paidbah, na ka liang ka Balang ka kyrpad ban nym shong palat pud ha ki kali namar kan ktah na ka jingrit jong ka surok bad khnang kan lait na ka jingjia ba sngewsih.
Ka jaka pynlong jingïaseng paidbah ha ka Sngi U Blei ka kham long lum, kumta la kyrpad ban wanrah kot ne jaiñ siang shong. Ïa ka jingtip ba bniah ïa katei ka shnong lah ban wad na ‘Google Nongkhlaw 793119’ khnang ban suk namar kane ka shnong kam dei Nongkhlaw jan Mairang ka dei Nongkhlaw jan Nongstoiñ.
