Shillong, Lber 01:
Ka Khasi Hills Autonomous District Council (KHADC) ha ka sngi Balang ka la mynjur ïa ka mang tyngka ba lai bnai kaba kot haduh T.46.27 klur, ka ban treikam naduh 1 tarik u Ïaïong haduh ka 30 tarik Jylliew, 2023.
Ïa kane ka mang tyngka ba la wanrah da u Chief Executive Member (CEM) ka KHADC ha ka sngi sdang ïa ka dorbar mang tyngka ka council la mynjur hapoh ka ïingdorbar thawaiñ jong ka KHADC. Kane ka mang tyngka kaba T.46.27 klur ka dei tang na ka bynta lai bnai namar bun ki daw ba ka district council kam lah ban wanrah ïa ka mang tyngka ba pura na ka bynta u snem 2023-2024.
U CEM haba wanrah ïa ka mang tyngka u la pyntip ba ka mang tyngka kaba T.46,27,16,190 kan treikam naduh ka 1 tarik u Ïaïong haduh ka 30 tarik u Jylliew 2023. Nangta u la ong ba ka jingwanrah ïa ka mang tyngka kaba tang 3 bnai ka dei namar ka jingthmit palat jong ka por ïa mynta. Kumta ïa ka mang pisa ba pura jong u snem 2023-2024 yn sa wanrah ha ka sien shong dorbar ka ban wan.
Haba ïadei bad ka mang tyngka ba T.46.27 klur, la mang T.9,29,73,230 sha ka General Administration Department, T.15,37,630 sha ka Law Department, T.2,11,70,910 sha ka Revenue Budget & Finance Department, T.2,38,94.710 sha ka Forest Administration Department, T.1,45,17,810 sha ka Administration of Justice & Judicial Department, T.1,86,66,370 sha ka Legislative Department, T.3,40,370 sha ka Education Department, T.27,53,18,430 sha ka Civil Works & Development Department bad T.1,42,96,730 sha ka tnat Enforcement Scheme ban ïada ïa ki Tribal Land.
Nalor kata, u la ong ba haba shim kyllum halor kane ka jingmang pisa ba tang lai bnai kan ailad ïa ki dkhot ban pynbit pynbiang ïa ki kot ki sla haba ïadei bad ka jingpynlut bad kumjuh ruh kane kan plie lad ban pynbit pynbiang ïa ki jingdonkam khamtam haba ïadei bad ka jingsiew tulop sha ki dkhot, ki ophisar bad kiwei kiwei de ki nongtrei ka KHADC nalor ka jingsiew ïa ki baibam tymmen sha kito kiba la shongthait.
Shuh shuh u CEM u la ong ruh ba ka jingmang pisa ba lai bnai kan kynthup lang ïa ka jingpynlut na ka bynta ki kam pynroi ïa kaba ka District Council ka la ïoh pisa na ka 15th Finance Commission. Ïa kane ka mang tyngka kaba mynta la leh namar ka CAG ka dang lum jingkheiñ haba ïadei bad ka jingpynlut ka Council.
“Namar kane ki ophisar ka KHADC kin ïoh por ban pynbit pynbiang ïa ki jingdonkam jong ka CAG kaba dang lum jingkheiñ haba ïadei bad ka jingpynlut ka District Council bad ki don bun ruh ki MDC kiba ïakhun ïa ka ilekshon MLA 2023 bad hadien kine baroh ki ophisar ruh kin sa lah ban pynbiang da ka mang tyngka ba pura,” la ong u Bah Titos.
