Ka Ïingdorbar Thawaiñ kaba khatwei ka Jylla kan ïoh noh ïa ki dkhot kiba thymmai na ka bynta san snem, kata, 2023 haduh 2028. Na ki 369 ngut kiba la ïakhun ha kane ka ilekshon 2023, tang 59 ngut kin shahjied ban long ki dkhot ka Ïingdorbar Thawaiñ na ka bynta san snem. Ha Meghalaya, ki dei ban don 60 ngut ki dkhot Ïingdorbar Thawaiñ kiba shahjied na ki konstitwensi bapher bapher, hynrei ha Sohïong konstitwensi, la buhteng shwa ïa ka jingthep vote, namar ka jingkhlad noh u kyrtong, ha kaba ka Election Commission shen kan sa pynbna ïa ka sngi ban pynlong ïa ka jingthep vote.
Ha ki phew snem kiba mynshwa, ka Ïingdorbar Thawaiñ ha Meghalaya, ka dei kaba la bna nam ha ka liang ka jinglah jong ki dkhot ban ïatai hapoh ka dorbar halor kiba bun ki mat. Ka dei ruh ka Ïingdorbar Thawaiñ kaba ïaid beit ïaid ryntih ha ka rukom pynïaid dorbar, wat lada ka don ka jingïapyni nia hapdeng ki MLA ka Liang Synshar bad ka Liang Pyrshah. Ha ki phew snem kiba la leit noh, ka Jylla ka la ïoh shisha ïa ki dkhot ka ïingdorbar kiba don ka jingnang jingtip bad kiba lah ban ïashimbynta ha kiba bun ki mat ïatai, ryngkat ka jingai jingmut ban wanrah ïa ki mat treikam kiba ïarap ban kyntiew ïa ka Jylla kham shalor.
Ha kane ka juk kaba la shai, ka Jylla ka la donkam ïa ki briew kiba don ka jingnang jingtip bad jingshemphang bad kiba tip ban wanrah ïa ki aiñ bad ki mat treikam kiba lah ban kyntiew ïa ka Jylla ha kiba bun ki liang. Ka kyrdan ka Ïingdorbar Thawaiñ ha Meghalaya ka la nang hiar ha kine ki khyndiat snem namar ki dkhot kiba shahjied ha ki paidbah ki dei kiba kham don spah, ym kiba kham don kyrdan pule. Ka long kaba donkam ïa ka Jylla ban ïoh ïa ki nongïalam kiba don ka jingïohi jngai bad kiba lah ban wanrah ïa ki buit treikam ban plie lad plie lynti na ka bynta ki samla khamtam ha kane ka juk ba jur ka jingkyrduh kam bad bun bha ki jingeh bad jingtynjuh ïa ki samla.
Ka Jylla kam donkam ïa ki nongsam skhim kiba lapmiet tang ban sam jingsam na ka bhah kaba la nang lypa da ka Sorkar man u snem ban leh ïa ki kam pynroi hapoh ka konstitwensi. Nalor ki kam pynroi kiba ka Sorkar ka leh ha kylleng ka Jylla, la ju bhah kyrpang palat T.2 klur shi snem ïa iwei-pa-iwei dkhot ka Ïingdorbar Thawaiñ na ka bynta ban pyntyllun ïa ki kam pynroi ha ki shnong ki thaw hapoh jong ka konstitwensi. Ka jingbhah lypa ïa ki MLA ka ïarap ban pynpoi ïa ki kam pynroi kiba ka Sorkar kan nym lah ban leh hi lut kum ka jingshna ïa ki lynti syngkien, bad ki jingtei jingshna kiba dei na ka jingmyntoi ki paidbah ha shnong ha thaw. Hynrei, ka Jylla ka donkam palat, ym ïa ki nongsam skhim, hynrei ka donkam ïa ki riewshemphang kiba long ki nongthaw aiñ bad ki nongsaiñdur kumno ban wanrah ki mat treikam kiba lah ban weng ïa jingeh ba ki paidbah ki mad khamtam kumno thaw thymmai pat ïa ka Jylla lyngba ka synshar ka khadar kaba khuid bad pynïoh ïa ka Sorkar kaba lah ban pynriewspah ïa ka Jylla lyngba ki lad pynmih pisa kiba pynbha ïa ka imlang ka sahlang bad kiba lah ban pynïoh ki lad kamai na ka bynta ban kyntiew ïa ka ïoh ka kot ki nongshong shnong.
Kyrmen ba ka Ïingdorbar Thawaiñ kaba khatwei kan ïoh ïa ki nongthaw aiñ, ym ki hehspah kiba la pyrshang ban ïoh bsuh khlieh lyngba ka saiñ hima na ka bynta ban kamai spah bad ka jingmyntoi shimet lem bad ka ïing ka sem jong ki.
