Lucknow, Lber:
Ka ïingbishar bakyrpang jong ka kynhun NIA jong ka Lucknow ha ka sngi Ba-ar ka la ai da ka rai ban pynïap ha ki kti jong ka aiñ pyrshah ïa ki 7 ngut ki dkhot jong ka kynhun lehnoh Islamic State (ISIS) bad ban set shirta jingim ïa uwei pat ha kaba ïadei bad ka jingjia jong ka jingïasuhbuit sniew ban leh ïa ki kam thombor ha Kanpur.
Kiba la ïoh ïa ka rai pynrem ba kin ïap ha ki kti jong ka aiñ ki kynthup ïa u Mohammad Faisal, Gaus Mohammad Khan, Mohammad Azhar, Atiq Muzaffer, Mohammad Danish, Mohammad Sayyed Meer Hussain bad u Asif Iqbal. Uwei pat ïa uba la tip kyrteng kum u Mohammad Atif ba la tip ruh da ka kyrteng kum u Asif Irani u la shah rai ba un shah set patok shirta jingim.
Kine baroh 8 ngut ki nongïarap bad ki dkhot jong ka kynhun lehnoh ki la shahkem ha Kanpur ha u snem 2017 ha kaba ïadei bad ka jingdonkti bad ïasuhbuit halor ban leh ïa ki kam pyntriem.
Ha kaba ïadei bad ka jingai ïa ka rai pynrem, u nongbishar jong ka ïingbishar ba kyrpang jong ka kynhun NIA u VS Tripathi u la ong ba kane ka jingjia ka dei ka bym pat ju jia koit bad kine kiba la shah rai pynrem ki la ïoh ïa ka jingpynshitom kaba tyngeh.
Ka jingmudui ejahar ha kaba ïadei bad kane ka jingjia la buh ha ka jaka treikam jong ki pulit ka kynhun ATS ha Lucknow ha ka 8 tarik, Lber, 2017.
Ha ka jingshisha, ka kynhun ATS ka la ïoh jingtip shaphang ka jingthmu jong kine ki dkhot jong ka kynhun lehnoh ISIS na ka bynta ban leh ïa ki kam thombor da kaba pynbthei bom ha kiba bun ki jaka jong ka ri.
Katkum ka jingïathuh jong u Public Prosecutor u KK Sharma, la ong ba baroh kine ki 7 ngut ki dei kiba la ïoh ïa ka rai ba ki dei ban ïap ha ki kti jong ka aiñ naba ki la shah pyngat ha ki kyndon 121 jong ka IPC ha ryngkat ka jingshah pynngat ha ka UAPA Act.
