Aizawl, Lber:
U Myntri ka tnat ki kam rep kam riang jong ka jylla Mizoram, u C. Lalrinsanga ha kane ka taiew kaba mynta u la pyntip ha Ïing Dorbar Thaw Aiñ ba ka sorkar jylla ka a shim ïa ki sienjam kiba kyrpang na ka bynta ban khaïi bad shalan ha ka sien kaba nyngkong eh ïa ki sohmynken kiba la tip kyrteng kum ki “bird’s eye chilli” sha ka ri United States of America (USA).
Haba ai jubab hadien ka jingshah kylli jingkylli ha u MLA ka Zoram People’s Movement (ZPM) – Lalduhoma, U C. Lalrinsanga u la pyntip ba haduh 7.5 metric ton u sohmynken “bird’s eye” yn sa shalan sha USA. U la pyntip shuh shuh ba ïa utei u sohmynken yn sa shalan sha USA hadien ba la dep ban pynkut ïa ka Dorbar Mang Tyngka jong ka sorkar jylla.
U la pyntip shuh shuh ba na ka liang ka Sorkar Jylla ka la dep ban ïoh ïa ka geographical identification (GI) na ka bynta utei u jait sohkynmen bad la lah ruh ban pyndep ïa ka ‘organic confirmation test’ ha ka taiew kaba la dep ha nongbah Bangalore.
Ha ka jingai jingkren jong u Myntri, u la pyntip shuh shuh ba ka sorkar jylla ka la shim ruh ïa ki sienjam kiba kyrpang na ka bynta ban kyntiew bad pynbha ïa ka kam rep syrti ha ka jylla. U la ïathuh ba ïa ka Fostering Climate Resilient Upland Farming System in the Northeast (FOCUS) la pyntreikam ha ki 6 tylli ki distrik jong ka jylla kiba hap hapoh ka Externally Aided Project (EAP) na ka bynta ban kyntiew bad pynbha ïa ka kam rep syrti.
U Myntri u la ïathuh shuh shuh ba ïa ka Integrated Farming System lane ka IFS (lai kyrdan) yn sa pyntreikam ha ki 20 tylli ki shnong jong ki 6 tylli ki distrik jong ka jylla kiba hap hapoh ka FOCUS.
Kum ban shu ïathuh hangne, ka jylla Mizoram ka dei kawei na ki jylla jong ka Thaiñ Shatei Lam Mihngi jong ka ri India ha kaba bun na ki nongshong shnong ka thaiñ ki shaniah ha ki kam rep kam riang. La ïathuh ruh ba ka kam rep syrti ka dei kawei na ki jait kam rep kaba ki nongshong shnong ki dang pyntreikam tad haduh kine ki sngi ba mynta.
