Shillong, Lber 02:
U Bah Brightstarwell Marbañiang uba dei u kyrtong ka Voice of the People Party (VPP) u la kylla long u kyrtong uba la wan shakhmat eh ban ïoh ïa ka jingjop kaba heh tam napdeng kiwei pat ki kyrtong kiba la ïoh ïa ka jingjop ha kane ka ilekshon MLA kaba dang shu dep shen hapoh Meghalaya.
U Bah Brightstarwell Marbañiang, ym dei tang ba u la ïoh ïa ka jingjop kaba heh tam, hynrei u la dei ruh uwei na ki radbah uba la lah ban pynliem syndon ïa u Bah Process T Sawkmie kyrtong ka UDP uba dang shu iehnoh kam MLA bad ïa u kyrtong ka NPP u Bah Teiborlang Pathaw uba dei u MDC ka Mawlai.
Hadien ka jingdep ban ñiew ïa ki vote ha ka sngi Palei, u Bah Brightstarwell u la ïoh haduh 24,262 vote na ki 40,747 tylli ki vote ba la thep ha Mawlai bad ban jop da haduh 15,648 vote pyrshah ïa u Bah Teiborlang Pathaw uba la wan ha ka kyrdan ba ar hadien ba u ïoh 8614 vote.
Ym tang katta, hynrei kane ka jingïoh vote jong u Bah Brightstarwell ka la dei ruh ka jingïoh vote kaba heh tam, namar wat lada kheiñ kyllum ïa ki vote jong baroh ki kyrtong kiba la ïakhun pyrshah ha kane ka ilekshon na Mawlai ruh kata kaba la poi sha ka 16,485; u Bah Brightstarwell u dang tam hi da 7777 vote.
Ha kawei pat ka khubor, u kyrtong ka BJP na South Shillong u Bah Sanbor Shullai u la dei pat sa uwei u kyrtong ban wan ha ka kyrdan ba ar ha ka jingjop bun, kata ha kaba u la ïoh ïa ka jingjop da kaba tam da 11,609 vote ïa u kyrtong uba wan ba-ar na South Shillong Konstitwensi.
Haba phai sha ka jingïoh vote, u Bah Sanbor Shullai uba la jop biang kum u MLA jong ka South Shillong, u la ïoh haduh 14,214 vote bad ban tam da 116,09 vote ïa u kyrtong ka VPP u Bah Danny Langstieh uba la wan ha ka kyrdan ba ar hadien ba ïoh 2604 vote.
Hangne ruh, wat lada kheiñ kyllum lut ïa baroh ki vote ba la ïoh da ki kyrtong kiba la ïakhun pyrshah, u Bah Sanbor u dang tam hi da 6805 vote.
Kumjuh ruh haba phai sha ka Pynursla Konstitwensi, u kyrtong ka NPP u Bah Prestone Tynsong u la jop ïa kane ka ilekshon da 8140 vote pyrshah ïa u kyrtong ka Congress u Bah Nehru Suting.
U Bah Prestone ha kane ka ilekshon u la ïoh haduh 13,745 vote katba u Bah Nehru Suting uba la wan ba-ar u la ïoh 5605 vote.
