Delhi, Lber:
Katkum ka khubor ba la pyllait da kawei na ki kynhun ialehkai Kriket ha ka lympung WPL ka Delhi Capitals, ka iathuh ba ka lah jied mynta ia ka khlur ialehkai ba pawnam ka Australia ka Meg Lanning ban long kum ka kapten ban ialam nakhmat ia ka kynhun baroh kawei ha ka lympung.
Nalor kata, katei ka kynhun ka la jied ruh ia ka nongtied ba pawnam ka India ka Jemimah Rodrigues kum ka symbud kapten. Kumta, ka Lanning ka long ka nongialehkai kaba dang shu dep ban pyniaid ia ka kynhun jong ka kum ka kapten sha ka lynti jingjop kaba hynriew bad rah syndon ia ka thong jingjop ha ka T20 Women’s World Cup da ka jinglah ban pynliem noh ia ka kynhun ia aireng ka South Africa. Ka Lanning ka long ruh ka kapten balai jong ka kynhun ialehkai kriket ka Australia ban shah jied mynta kum ka kapten jong katei ka kynhun na ka bynta ka lympung kata hadien ka Beth Mooney; kapten ka Gujarat Giants bad ka Alyssa Healy ka ban sa pyniaid ia ka kynhun UP Warriorz.
Kum ka nongialam ba pawbha jong ka Australia, ka Lanning ka lah dep ban ialehkai 132 tylli ki jingialehkai T20Is na ka bynta ka kynhun jong ka ha ryngkat bad ka jinglah ruh ban kamai ia ki 3405 ron. Kumjuh ruh ka Jemimah ka la leh ia ka kam ba radbah ka jong ka ha ka jingiaid lyntilang bad ka kynhun ialehkai ka ri kaba lah poi sha kaba kut ka jingiaid lynti jong ka ha ka jingiakhun semifinal da ka jngshah pynliem noh ha ka Australia.
Ia ka kynhun Delhi Capitals yn sa pyniaid ban shimti ia ka kynhun baroh kawei da ka Jonathan Batty, katba ka nongpyniaid barim jong ka England ka Lisa Keightley bad ka nongialehkai barim ka India ka Hemlata Kala ki long kum symbud nongpyniaid ba ha khlieh duh ka kynhun.
