Italy, Lber:
U Just Fontaine uba ju iai long barabor uwei na ki nongialehkai phutbol uba hajrongeh ha ka jinglah ban iai kamai kol na ka por sha ka por bad khamtam eh ha kawei ka lympung ialehkai World Cup kata da 13 kol kynthih, u lah khlad noh mynta u snem ha ka rta ba 89.
Kitei ki 13 kol kiba u Just u la lah ban kamai tang kawei ka samoi ialehkai World Cup kata ha u snem 1958 kan long ka jingsah kynmaw shijunom bad ka jingiai pyrto da kiwei pat ki rangialehkai jong kane ka juk kaba mynta ha kaba ym pat shym la don mano mano ruh na ki nongialehkai ban kamai da kattei kol ha katei ka lympung. Kumta ruh haduh mynta, dei tang lai ngut ki nongialehkai kiba la lah ban kamai khambun kol ban ia u Just Fontaine, watla utei u rangialehkai jong ka klob Reims u paw tang ha kawei ka lympung ialehkai bad ialehkai tang ha ki hynriew tylli ki jingialehkai.
Kumjuh ruh ka WC ha u 1958 kaba lah long ha Sweden lah kynmaw ia ka jingmih madan jong u khlur ialehkai ka Brazil u Pele ha ka rta ba 17 snem; ha kaba u lah ai mynsiem ia ka kynhun baroh kawei da kaba thep ia ka kol jingjop kaba lai (hat-trick) ha ka jingiakhun semifinal ha kaba ka kynhun ka lah rah ia ka jingjop pyrshah ia ka France da 5-2. Hynrei ka long pat ka jingjop bad jingseisoh ba shimet jong u Just Fontaine kiba u lah bat ia ki 4 kol ha ka jingiaknieh kyrdan balai bad rah ia ka thong jingjop pyrshah ia ka West Germany. Dei tang u rangialehkai barim ka Germany u Miroslav Klose (16 kol), Ronaldo ka Brazil (15 kol) bad u Gerd Mueller; khlur ialehkai ka West Germany jong ka WC 1970s uba lah kamai kol 14 sien, ha kaba kitei kiwei ki long ki rangialehkai kiba lah kamai kol bun tylli ha ka lympung. Tang arngut kiwei pat ki rangialehkai kata u Mueller da ki 10 kol ha u 1970 bad u rangialehkai na Hungary u Sandor Kocsis da 11 kol ha u 1954 kiba lah kynjoh arshah ka jingthepkol jong ki ha ka World Cup.
Haba phai sha ka kam shakri jong u Fontaine hadien ba u lah shongthait na ka kam ialehkai ka jong u, utei u rangialehkai u lah ioh ban pyniaid ia ka kynhun ialehkai ka France ha u snem 1967 bad uba iaisah bad ka kynhun khatduh eh tang ha ki ar jingialehkai ha kaba baroh ar tylli u lah mad ia ka jingshah pynrem ha ka jingialehkai paralok. Ka jingpyntyllun ia ka kam shakri ka jong u bad ka Paris Saint-Germain ka long kaba lah seisoh shibun ha kaba u Just u lah rah ia ka kynhun baroh kawei sha ka lympung ialehkai kaba pawnam jong ka ri France ha u snem 1974.
