Jowai, Lber 02:
Tang hadien ba la dep ïa ka jingñiew vote bad jop biang u kyrtong ka UDP u Bah Nujorki Sungoh kum u MLA ka Mowkaïaw Konstitwensi, ki nongkyrshan jong ka NPP ki la khie bitar bad ki la lun maw ïa ki ïing ki sem jong ki paid nongkyrshan ka UDP ha Sahsniang ha ka sngi Palei.
Ka tyllong khubor ka ïathuh ba ki nongkyrshan ka NPP ha Sahsniang ki la pakhang ïa ka surok bad ki lynti syngkien ïa ki nongkyrshan jong ka UDP bad pyni bor ruh wat ïa ki shipai CrPF kiba pahara ha katei ka shnong.
Dei hadien katto katne por ki la lun maw sa ïa ki ïing ki sem jong ki nongkyrshan ka UDP bad ka la don ruh ka jingthmu ban thang ïa ki trep kali motor.
La ïathuh shuh shuh ba ka jinglong jingman ka shongsuk shongsaiñ ha katei ka shnong ka la shah ktah bad kiba bun ki nongkyrshan ka UDP ki la hap ban phet rieh ïalade sha ki jaka ba shngaiñ.
Kane ka jingjia lun maw ha kane ka thaiñ kam dei shuh ka sien kaba nyngkong.
Kum ban shu pynkynmaw ha u snem 2019 ruh ha ka ilekshon MDC, ka la jia ha ka shnong Mowkaïaw hadien ba la jop u kyrtong ka UDP, ki nongkyrshan ka NPP ki la pynjulor ïa bun tylli ki ïing ha Mowkaïaw.
Halor kane ka jingkynad ha Sahsniang, u District Magistrate ka West Jaiñtia Hills District u Bah BS Sohliya, u la pynjari da ka korphiw katkum ka kyndon aiñ kaba la pynkup ha u katkum ka section 144 CrPC tad haduh ba pynbna da kumwei.
U District Magistrate u la pynjari da ka korphiw kum shi bynta ban tem ïa ka jingkulmar bad ban pynneh ïa ka shongsuk shongsaiñ ha katei ka jaka.
Ha kawei pat ka khubor, kum kane ka jingjia jong ka jingshah lun maw ka la jia ruh ïa ki ïing ki sem ha ka shnong Nangbah, West Jaiñtia Hills District ha ka 2 tarik u Lber, 2023.
Ka shnong Nangbah ka hap ha ka Raliang Konstitwensi kaba la jop da u kyrtong ka NPP u Bah Comingone Ymbon.
Kane ka jingjia shah lun maw ka la jia ha Ïawmusiang Nongbah ha kaba ki ïing jong ki nongkyrshan ka PDF ki la shah lun maw ha ki briew kiba ym lah satia ban tip.
Ka shnong Nangbah ka don ar ngut ki kyrtong na ka juh ka shnong kata ka BJP bad PDF nalor u kyrtong UDP, TMC, Congress.
Haduh ba la thoh ïa ka khubor ym don kano kano ka jingmynsaw. Na ka liang ka bor synshar district ka la pynjari da ka korphiw ban tem ïa ka jingkynad bad ban pynneh ïa ka shongsuk shongsaiñ.
