Nongstoiñ, Lber 02:
Lai ngut ki MLA na ki lai tylli ki konstitwensi hapoh ka West Khasi Hills; kita ka Mawshynrut, Nongstoiñ bad Rambrai-Jyrngam ki la liem lyndang ha kane ka ilekshon hadien ba la pynbna ïa ka risol ha ka sngi Palei.
Kine MLA kiba la liem ki kynthup ïa u Bah Gigur Myrthong kum kyrtong ka NPP na Mawshynrut uba la shah pynliem noh ha u kyrtong ka HSPDP u Bah Methodius Dkhar, u Bah KP Pangniang kyrtong ka HSPDP bad u Bah Kimfa S Marbañiang kyrtong ka NPP na Rambrai ki la shah pynliem noh ha u kyrtong shimet ne kyrtong khlem seng u Remington G Momin bad u Bah Macmillan Byrsat kyrtong ka NPP na Nongstoiñ u la shah pynliem noh ha u kyrtong ka Congress u Bah Gabriel Wahlang.
Haba phai pat sha ka jingïoh vote jong kine ki kyrtong, la ong ba u Bah Gabriel Wahlang uba la ïoh 13,847 vote u la jop ïa kane ka jingïakhun da 2624 vote ïa u Bah Macmillan Byrsat uba la ïoh 11,223 vote bad wan ha ka kyrdan kaba ar.
Katba u Bah Methodius Dkhar pat u la ïoh haduh 19,368 vote bad u la jop ïa kane ka jingïakhun da 5187 vote pyrshah ïa u Bah Gigur Myrthong uba la wan ha ka kyrdan ba-ar hadien ba u ïoh 14181 vote.
Katba u RG Momin uba dei u kyrtong khlem seng na Rambrai u la ïoh haduh 9057 vote bad ruh ban pynliem ïa u Bah Kimfa S Marbañiang, uba dang shu ieh noh ïa ka kam MLA bad ruh ïa u MLA barim ka HSPDP, u Bah KP Pangniang ka HSPDP.
U RG Momin uba la ïoh 9057 vote, u la jop da 110 pyrshah ïa u Bah KP Pangniang kyrtong ka HSPDP uba la ïoh 8947 vote bad ïa u Bah Kimfa S Marbañiang ka NPP uba la ïoh 7272 vote.
Haba kren sha ki lad pathai khubor u Bah Gabriel Wahlang, MLA ba thymmai ka Nongstoiñ ha kajuh ka por kum u MDC u la ong, “Ngan buh ïa ki paidbah hakhmat bad ngan ai ka jingshakri kaba bha tam sha ki.”
U Bah Methodius Dkhar uba la shah jied kum u MLA ba thymmai jong ka Mawshynrut u la ong ba ka jingangnud jong u paidbah Mawshynrut kata ka dei ka jingangnud kaba hakhmat ka jong nga.”
Shuh shuh u la ong ruh ba kaei ka thong kaba hakhmat jong u paidbah Mawshynrut kata ka dei ka jong u bad ki bynta kiba kongsan eh kaba ma u un shim haba u la shah jied kum u MLA ka long ba un buddien ïa ki kam ba ki MLA kiba rim ki la leh.
Ha kaba ïadei bad ka jingthaw sorkar, u Bah Methodius u la ong ba kumba u donlang ha ka seng un sa ïa peit ryngkat-ryngkat kaei kaba kan rai.
Katba u Remington Gabil Momin, MLA ba thymmai ka Rambrai-Jyrngam u la ong, “Haba u ïaleh ïa kane ka ilekshon, um shym la tip la un jop ne un nym jop, hynrei u shaniah tang ha U Blei ba u don ïa ka jingangnud ban shakri ïa u paidbah.”
Shuh shuh u la ong ruh ba hadien ba u la shah jied mynta un pyrshang ban rung bad ïatreilang bad kano-kano ka sorkar ka ban sa thaw namar lada yn nym don lang bad ka Sorkar kan long kaba eh.
Haba phai sha ka jingïoh vote jong kiwei pat ki kyrtong kiba la ïakhun ha kane ka ilekshon na Nongstoiñ ki long u Bah Diosstarness Jyndiang, kyrtong ka BJP u la ïoh tang 253 vote, u Bah Polesstar Nongsiej kyrtong ka UDP u la ïoh 7505, u Bah Macmillan Kharbani kyrtong ka TMC u la ïoh 1091, u kyrtong ka HSPDP u Bah Sanjied Kynsai Shangrit u la ïoh 1390, u Bah Bobby B Kharchandi kyrtong ka VPP u la ïoh 3755, u Bah Steinbinel Wanniang kyrtong shimet u la ïoh 209 bad u NOTA u la ïoh 95 vote.
Ha Rambrai-Jyrngam kiwei ki kyrtong ki kynthup ïa u Bah Fernandez Dkhar kyrtong ka TMC u la ïoh 1554, u Bah Goldenstar Nonglong kyrtong ka Congress u la ïoh 5805 vote, u Bah Spasterlin Nongrem kyrtong BJP u la ïoh 689 vote, u Sillash M Sangma kyrtong shimet u la ïoh 159, bad u Francis Pondit R Sangma u la ïoh 373 katba u NOTA u la ïoh 196.
Ha Mawshynrut Constituency kiwei ki kyrtong ki kynthup ïa u Bah Bejoy Kynter kyrtong ka BJP u la ïoh 286, Andrew Charles Gare kyrtong ka INC u la ïoh 220, u Justin G Momin kyrtong ka TMC u la ïoh 2065, bad u NOTA u la ïoh 311.
