Shillong, Lber 02:
Ki paidbah ka 19-South Shillong Konstitwensi haduh kane ka sien kaba mynta ki dang ïai bat skhem ïa u Bah Sanbor Shullai uba dei u kyrtong ka Bharatiya Janata Party (BJP) ba un long kum u nongmihkhmat jong katei ka thaiñ bad ym tang katta hynrei ki paidbah ka South Shillong ki lah da pynjop donburom ruh ïa utei u kyrtong.
Hadien ka jingpynbna ïa ki vote ha ka 2 tarik ha Polo, u Bah Sanbor Shullai u la ïoh 14,213 vote katba u kyrtong ka Voice of the People’s Party (VPP), u Bah Danny Langstieh u la ïoh 2,604 vote ha kaba u Bah Sanbor u lah tam haduh 11,609 vote ïa utei u kyrtong.
Haba kren bad ki lad pathai khubor hadien ka jingïoh jingjop, u Bah Sanbor u la ong ba kumno ka seng BJP kan lah ban pynurlong ïa ki mat jingdawa jong ki paidbah haba ka BJP ha kane ka jylla ka ïoh jingjop tang ar ngut.
“Ki paidbah jong ngi ki la dei ban sngewthuh bad ki la dei ban ai kum hapoh Nagaland ha kaba ka roi ka par ka wan, ka ïoh kam ïoh jam jong ki samla ka don namar ha katei ka jylla ïa ka sorkar la ïalam da ka BJP,” la ong u Bah Sanbor.
Shuh shuh u la ong ba ki paidbah ka jylla haduh lano kin sngewthuh bad lehse, kim don jingsngewthuh bad kim kwah ïa ka roi ka par, ka jingïoh kam ïoh jam na ka bynta ki samla bad kane ka pynsngewsih ïa u shikatdei eh.
U la ong ba kiwei kiwei ki jylla ki shaniah ha ka seng BJP bad ka roi ka par ka tuid sha ka jylla ka jong ki bad ki samla jong kitei ki jylla kim donkam ban leit wad kam shabar jong ka jylla, hynrei ka wad da ka kam ïa ki samla nadien jong ki; hynrei ki paidbah ka jylla Meghalaya pat kin ïai mad ïa kajuh shi kajuh ka jingjynjar ha ki 5 snem ki ban sa wan.
Haba kylli la hato ka seng BJP kan ïatreilang lang biang sa shisien bad ka seng National People’s Party (NPP) ban thaw ïa ka sorkar synroplang, u Bah Sanbor u la ong ba um pat lah ban rai ïa kata, hynrei yn sa lah ban rai tad haduh ynda la dep ka jingïalang bad u Himanta Biswa Sarma uba dei u Myntri Rangbah ka jylla Assam.
Ka seng BJP napoh ka jylla ka la lah ban jop tang na ki artylli ki konstitwensi, kata u Bah Sanbor Shullai na South Shillong Constituency bad u Bah Alexander Laloo Hek na Pynthorumkhrah Constituency.
