Shillong, Lber 02:
Ka jingpynkhreh ban thaw ïa ka Sorkar kaba thymmai ka la ïaid ha kaba ka Bharatiya Janata Party (BJP) kaba don 2 ngut ki MLA, ka la tyrwa ban ai jingkyrshan lang ïa ka National People’s Party (NPP) lada ka thaw ïa ka Sorkar.
Ka NPP ka dei kaba la jop bun eh na baroh ki seng saiñ pyrthei ha kane ka ilekshon, ha kaba ka la ïoh 26 ngut ki MLA. Ka NPP ka donkam sa 5 ngut ki MLA ban thaw ïa ka Sorkar.
Na ka liang ka BJP ka la phah da ka shithi lyngba u President ka BJP Meghalaya, u Bah Ernest Mawrie sha u Conrad K Sangma, uba dei u National President ka NPP, bad u MLA uba la shahjied biang na South Tura konstitwensi ha kane ka ilekshon.
Ha ka shithi kaba la soi da u Bah Mawrie, la ong ba katkum ka jingbthah jong u National President ka BJP u JP Nadda, u phah ka shithi ai jingkyrshan na ka bynta ka jingthaw ïa ka Sorkar kaba thymmai hadien ka jingmih na ka jingñiew vote ha kane ka ilekshon MLA, 2023.
Ka tyllong khubor ka ïathuh ruh ba ki don ruh ki kyrtong shimet kiba kloi ban ai jingkyrshan lang ïa ka NPP ban thaw ïa ka Sorkar.
Na ka liang kiwei pat ki seng saiñ pyrthei, kum ka UDP, VPP, PDF, HSPDP kim pat shim ïa kano-kano ka rai kat haduh mynta la ki kloi ne em ban thaw Sorkar lang bad ka NPP.
