Shillong, Lber 02:
Ka jingñiew vote ha ka sngi Palei haba ïadei bad ka ilekshon sha ka Ïingdorbar Thawaiñ kaba khatwei ka Jylla, ka la pyni ïa ka jingjop kaba pharia hapdeng ki seng saiñ pyrthei, ha kaba ka National People’s Party (NPP) ka la long biang ka seng kaba ïoh bun eh ki MLA, kata haduh 26 ngut, bad ka donkam sa 5 ngut ki MLA na ka bynta ban ïoh ïa ka jingbun paid ban thaw ïa ka Sorkar kaba thymmai.
Ka United Democratic Party (UDP) ka la jop bad ïoh 11 ngut ki MLA ha kane ka ilekshon, da kaba kiew na ka 7 ngut ki MLA kaba ka don ha kine ki snem, sha ka 11 ngut ha kane ka ilekshon.
Ka Congress kaba khlem don MLA shuh hashwa ba kan leit sha ka ilekshon, ka la jop tang 5 ngut ki MLA, katba ka All India Trinamool Congress (AITC) kaba pynpait ïa ka Congess da kaba rong noh 12 ngut ki MLA, ka la ïoh tang 5 ngut ki MLA ha kane ka ilekshon.
Ka long ka jingdiaw lehse ïa kine ki seng baroh ar tylli, ka Congress bad AITC, namar ka jingpynpait ïa ka Congress ha u snem 2021 ka la long pynban ka jingkyrkhu ïa ki seng kiba don ha ka Sorkar MDA khamtam ïa ka NPP ha Rilum Garo bad UDP ha Rilum Khasi Jaiñtia.
Ka NPP kaba la nang kiew ha ka jingdon ki MLA sha ka 23 ngut ha ka ilekshon shiteng samoi ha u snem 2021, mynta ka kynti ka la nang kiew artet ka jingdon ki MLA sha ka 26 ngut.
Ka Bharatiya Janata Party (BJP) bad ka Hill State People’s Democratic Party (HSPDP) kiba ïoh tang 2 ngut ki MLA ha ka ilekshon 2018, mynta ka kynti ki la ïoh biang mar 2 ngut ki MLA ha kane ka ilekshon.
Hynrei ka People’s Democratic Front (PDF) kaba ïoh 4 ngut ki MLA ha ka ilekshon 2018, ka la nang hiar arsut da kaba jop tang 2 ngut ki MLA ha kane ka ilekshon.
Ha ka ilekshon 2018, ki MLA shimet ki don lai ngut, hynrei ha kane ka ilekshon ki MLA shimet ki don tang 2 ngut.
Napdeng ki seng saiñ pyrthei kiba jop ha kane ka ilekshon, ka jingjop jong ka Voice of People Party (VPP) kaba dei ka seng kaba kham pynkyndit tam namar ka jop 4 ngut ki MLA, bad ka jingjop kput ha Mawlai konstitwensi ka la pynkyndit bad pynshaïong hi ngaiñ ïa ki paidbah, namar ym don kiba khmih lynti ba ka jingjop u kyrtong jong ka kan long da kaba tam kput.
