Patna, Lber:
U khlur ialehkai kawang Sum ba paw ka India bad uba la lah ruh ban pynioh takma Ksiar sha ka ri na ka Tokyo Olympic u Neeraj Chopra, u la leit mynta ban shah hikai pyntbit bad kilan-met sha Potchefstroom, South Africa kum ka jingpynkhreh na ka bynta ka aiom ialehkai ka ban wan.
Ka khubor ka iathuh ruh ba ia ka tei ka jingleit shah hikai pyntbit bad kilan-met ka jong u lah iarap song pisa ia u hapoh ka Target Olympics Podium Scheme (TOPS), kaba don ia ka jingthmu na ka bynta ban ai ka jingkyrshan sha ki nongialehkai ka ri ha ka jingthmu ka jong ki ban khur takma na ka bynta ka ri ha ka lympung ialehkai Olympic. Kumta ki paidbah nongkyrshan ba shit rhem jong utei u khlur ialehkai ki lah ban sakhi ia ka jingshimbynta ka jong u ha ki kam ialehkai ha ka World Athletics Championships ka ban sa long ha u Nailar, Asian Games 2022 ha China ha u bnai Nailur bad ha ka Diamond League kiba long ki lympung ialehkai ba pawkhmat jong une u snem.
Ha ka World Athletics Championships kaba lah long ha u Naitung 2022, u Neeraj Chopra u la lah ha ka ban thaw ia ka khana-pateng ha ka ri da kaba kylla long tang kum u nongialehkai ba-ar ka ri bad uba nyngkong napdeng ki shynrang ha ka kam ialehkai Track & Field ban khur takma na katei ka lympung. U long ruh u rangialehkai uba lah wan ba-ar ha katei ka lympung iakhun bad rah ruh ia ka takma Rupa, da kaba iai phrang shuh shuh ia ka jingthmu ka jong u na ka bynta ban khur takma ha ka World ha ka jinglah ban kawang ia u Sum ha ka jingjngai kaba 88.13m. Ha u bnai Nailur u Chopra u lah thaw ruh ia ka khana-pateng da kaba long u nongialehkai ka ri uba nyngkongeh ban rah ia ka thong jingjop ha ka Diamond League ha ka jinglah ban kawang ha ka jingjngai kaba 88.44m na ka bynta ban khur ia ka jingjop bakhraw ha ka jingim ialehkai ka jong u.
Haduh mynta u dang iai bat ia ka rekod napdeng ki shynrang da ka jinglah ka jong u ban kamai ia ka nam jop ha Stockholm Diamond League ha ka jingkawang jngai kaba 89.94m ha kaba u la lah ruh ban pynkhein la ka jong ka rekod.
