Mawkyrwat, Lber 02:
Ka United Democratic Party (UDP) ka la ïoh ïa ka jingjop ha baroh artylli ki konstitwensi jong ka South West Khasi Hills lyngba u Bah Renikton Lyngdoh Tongkhar na Mawkyrwat Constituency bad u Bah Pius Marweiñ na Ranikor Constituency.
Kum ban shu kdew u Bah Renikton Lyngdoh Tongkhar u la ïoh haduh 10,678 vote bad u la jop ïa u Bah Carness Sohshang kyrtong ka Congress da 1272 vote.
Katba u Bah Pius Marweiñ u la ïoh haduh 16,502 vote bad u la tam kput ïa u Martin M Danggo kyrtong ka BJP da 5649 vote.
U Bah Renikton Lyngdoh haba ai jingkren sha ki lad pathai khubor, nyngkong eh u la ai khublei kyrpang ïa ki paidbah ka Mawkyrwat constituency kiba la kyrshan bor bah ban pynjop biang ïa u ha kane ka ilekshon 2023.
U la ong ruh ba ka jingïaleh ha kane ka kynti ka long kaba sngewtynnad bha namar ka jingbun ki kyrtong bad kiba ïa biang bor baroh khoit.
Kumta u khot bad wer ïa ki paidbah ka Mawkyrwat constituency ba kin ai ka jingïatrei lang khnang ban wanrah ïa ka roi ka par hapoh ka konstitwensi da kaba bynrap ruh ba nangne shakhmat un long u nongmihkhmat jong baroh ki paidbah ka konstitwensi ym dei shuh tang u MLA ka UDP.
Katba na ka liang u Bah Pius Marweiñ pat u la ong ba ka jingjop kput jong u ïa u kyrtong ka BJP ka dei namar ba ki paidbah ka Ranikor konstitwensi ki dang shaniah ha ka jingïalam jong u ha kine ki snem ba la dep.
Kumta u la ong ruh ba kumba ki paidbah ki pynjop donburom ïa u, un trei shitom shuh shuh kham bun shah ban pyndep ïa ki kam kiba sahteng bad ban wanrah ïa ka roi ka par hapoh ka konstitwensi.
