Khliehriat, Lber 02:
Ka Kong Santa Mary Shylla ka la kylla long ka MLA kynthei kaba nyngkong eh na rilum Jaiñtia hadien ba ka la lah ban pynliem ïa u nongïalam ka Congress bad u MP ka Shillong u Bah Vincent H Pala bad kumjuh ruh ïa u Bah Shitlang Pale MLA kyrtong ka UDP na Sutnga Saipung Konstitwensi hadien ka jingñiew vote kaba long ha ka sngi Palei.
Ka Kong Santa ka la ïoh haduh 16,974 vote bad ban jop da 1828 vote ïa u Bah Vincent H Pala uba la ïoh 15,146 vote bad wan ha ka kyrdan ba ar, katba u Bah Shitlang Pale u la ïoh 10,453 vote.
Haba phai pat sha ka Khliehriat Konstitwensi u Bah Kyrmen Shylla na ka UDP uba la ïoh haduh 23,514 vote u la pynliem noh ïa u kyrtong ka NPP u Bah Nehlang Lyngdoh uba la ïoh 17,908.
Ha Amlarem Konstitwensi u Bah Lahkmen Rymbui uba dei u MLA ka thaiñ bad Myntri ka sorkar jylla u la wan phai biang da ka jingjop hadien ba u la lah ban pynliem noh ïa u kyrtong ka NPP u Bah Stephanson Mukhim tang da 57 vote.
Ha Nartiang Constituency u Bah Sniawbhalang Dhar u la wan phai biang kum u MLA hadien ba pynliem ïa u kyrtong ka INC u Bah Emlang Laloo da kaba tam da 2023 vote. U Sniawbhalang Dhar u la ïoh vote 16,696, u Emlang Laloo INC u la ïoh 14,846 vote, u Genrous Paslein (IND) u la ïoh 7404 vote, u Dawan Lyngdoh ka UDP u la ïoh 893 vote, u Nota 433 bad u Rimiki Sari 282 vote.
Na Jowai Constituency u Bah Wailadmiki Shylla ka NPP uba la ïoh 14,079 u la jop da 2667 vote pyrshah ïa u kyrtong ka TMC u Awhai Andrew Shullai uba la ïoh 11,412 vote. U Bah Moonlight Pariat (UDP) u la ïoh 10,260 vote. U Allan K Suchiang (BJP) u la ïoh 326 vote bad u Daniel Dan (INC) ula ïoh 216 vote katba u NOTA 423 vote.
Na Mowkaïaw Constiuency u kyrtong ka UDP u Nujorki Sungoh u la jop biang da kaba ïoh 14,508 Vote. Ba ar u kyrtong ka NPP, u Habahun Dkhar 10,607 Vote katba uba lai u Nehemayah Tyngkan naka Congress 10,290 Vote. U Lasting Suchiang (TMC) 872 Vote, ba san u Currentis Rabon (BJP) 110 Vote katba u NOTA 360 Vote.
Na Raliang Constituency u Comingone Ymbon kyrtong ka Party NPP ula jop na ka 3-Raliang Constituency bad ka ula ïoh 13,626, wan ba ar u Lakhon Biam (BJP) 8289, J. Treilang Suchiang (UDP) 5250, u Bah Richard S. Lyngdoh (INC) 4154, u Shemhok Garod (PDF) 2513 bad u Robinus Syngkon (TMC) u la ïoh 1269 katba u NOTA ula ïoh 359.
Haba ïakren bad ki lad pathai khubor, u Bah Lahkmen Rymbui u la ong, ka jingjop election jong u kadei ka jingjop jong u paidbah la kadei ïa ki nongkyrshan ne ki bym kyrshan kam pher eiei hynrei dei ban don ka mynsiem ban ïeid iwei ia iwei.
“Kane ka ilekshon kaba mynta ka dei ka ilekshon kaba eh tam namar ka jingïakhun kam dei shuh tang para war, hynrei bun ki briew kiba nabar jong ka konstitwensi ki wan theh pisa”, la ong u Bah Lahkmen bad u la ai ka jingïaroh ïa ki paidbah ka konstitwensi khamtam u duk u suk uba ïeng ha ka nongrim ban pynjop ïa ka lawei ki khun ki kti, ka konstitwensi bad ka shnong ka thaw.
U la bynrap ruh ba ka bor jong ka pisa ka khlaiñ bha ban pynliem ïa u, hynrei ka sur jong u paidbah ka Amlarem Constituency ka kren shai ba ym don ba lah ban thombor ïa ka hok jong u briew.
U Comingone Ymbon, u la ong ki paidbah ka Raliang Constituency ki dang shaniah ïa u bad kaba sah mynta kadei ka kamram jong u ban wanrah ïa ka roi ka par hapoh ka konstitwensi bad ka Jylla hi baroh kawei.
U la ong ka jingdawa kaba hakhmat eh na bynta ka konstitwensi ka dei ban kyntiew ïa ka pule puthi, ka koit ka khiah bad ban pynmiat pynbha ïa ki lynti synkieng.
U Wailadmiki Shylla u la ai khublei ïa ki para nongïakhun pyrshah bad khot ban wan ïatreilang na bynta u paidbah bad u la khot ïa ki seng sain pyrthei kiba juh kynthoh kynnoh bad kiba juh ïarap ïa u ban jop bad ban klet noh ïa ka ilekshon.
Ha kawei ka liang u Wailadmiki Shylla u la kular paidbah ba ïa ki mat kiba u la khlei ha ka por ïalap ilekshon un pynurlong noh bad ka mat kaba u kwah eh ban pynurlong ka long ban wanrah sa kawei ka Water Supply Scheme khamtam hapoh ka sor Jowai ban pynïoh um ïa man ki thliew ïing ka sor Jowai kumjuh ruh ban kyntiew kyrdan ïa ka Civil Hospital na ka District Hospital sha ka State Hospital bad u la buh thong ruh ban wanrah sa kawei ka Government College hapoh ka District bad ban wad lad wad lynti ban pyntreikam noh ïa ka BEd College kaba la pynkynriah sha Kiang Nangbah bad kiwei kiwei ki kam pynroi.
U Nujorki Sungoh u la ong ha ka jingïaid lynti kum u nongmihkhmat u la pyrshang katba lah ban pyndep ïa ki kam kiba sahteng hapoh ka konstitwensi. Ka thong kaba hakhmat eh ba u kwah ban trei na bynta ka konstitwensi ka long ban kyntiew kyrdan ïa ka Laskeiñ C&RD Block sha ka Civil Sub Division.
