Hyderabad:
Ka Samantha Ruth Prabhu ka la rakhe ia ka jingdap 13 snem ha kaba iadei bad ka kam ak phlim ha kaba kane ka puron haba iakren halor kane ka la ong ba kane baroh ka dei namar ka jingai jingkyrshan jong ki nongpeitkai ia ka naduh ka sien nyngkong ba ka la bsuh kjat ha ka karkhana jong ka Tollywood.
Ka Samantha kaba la ak bad shim bynta ha ki phlim Telegu bad Tamil ka la khring ia kiba bun ki nongpeitkai da ki phlim ba ka shim bynta kiba long ruh ka jingiohnong bad jingkyrkhu ia ka.
Kane ka puron jong ka ‘Ye Maaya Chesave’ haba iakren halor ka jingiaid lynti jong ka ha ka kam ak phlim ka la iathuh ba wat lada ka la mad shibun bha ki jingeh bad ki diengpyng-kiang ha ka jingim jong ka pynban kam shim la randien na kaei ba ka thmu bad dei ruh kane kaba la pynlong ia ka kumne kumba ka long mynta.
Ka Sam kaba la shad ruh ha ka item number jong ka Pushpa: The Rise ka sngew ba ka por ka la iaid sted ha kaba khlem da poi pyrkhat ka la jam syndon sha ka 13 snem ha ka kam ba ka trei.
Kum shi bynta ban pyniajan ialade bad ki nongbud jong ka, ka Sam ka ju sngewtynnad bha ban iasam sha kiba bun ia kiei kiei la ka long ha ka jingleitkai sngewbha jong ka sha kylleng ki jaka, ki phlim thymmai ba ka ak bad kiwei kiwei.
Ha shwa ba ka Sam kan rung sha ka kam ak phlim ka la long ka Model bad ka la ioh ban rung sha Tollywood ha u 2010.
Kum ka puron ki phlim ba paw bha ba ka Sam ka la ioh ban ak ki kynthup ka Dookudu (2011), Seethamma Vakit lo Sirimalle Chettu (2012), Attarintiki Daredi (2013), Kaththi (2014), Theri (2016), 24 (2016), Mersal (2017), Rangas thalam (2018) bad kiwei kiwei.
Ha u 2021 kane ka puron ka la ioh jingiaroh halor ka bynta ba ka ak ha ka Family Man ha kaba ka bynta ba ka shim ka la pynlong ia ka ban iohrah ia ka OTT Award for Best Actress in a Drama Series.
