Shillong, Lber 02:
Ka Voice of the People’s Party (VPP) kaba la jop haduh 4 ngut ki MLA, ha ka sngi Palei ka la pynpaw ba kan nym treh satia ban ïatreilang bad ka National People’s Party (NPP) na ka bynta ban thaw ïa ka Sorkar bathymmai.
Kawei na ki daw kaba hakhmat eh halor kane ka jingbym treh ban ïatreilang ka long halor ka nongrim ba ka la jur palat ka jingkynnoh bamsap pyrshah ïa ka NPP ha kine ki san snem ba la leit noh.
Wat la ka VPP kaba dang dei ka seng kaba thymmai, hynrei ka la jop haduh 4 ngut ki MLA bad ka la pynpaw ba ka jingkwah ba hakhmat eh ka long ban ïoh ïa ka Sorkar kaba ïalam da ki seng riewlum hapoh ka Jylla.
Haba kren sha ki lad pathai khubor hadien ba la shah jied biang kum u MLA ka Nongkrem, u Bah Ardent M Basaïawmoit uba dei ruh u President ka VPP, u la ong ba ka jingkylli ban ïakren bad ka NPP ban thaw Sorkar kam mih satia namar ka seng jong u kam don jingkwah satia ban ïatreilang bad ka NPP.
Haba kylli ïa ki daw halor ka jingpyrshah ïa ka NPP, u Bah Ardent u la ong ba ki jingkynnoh bamsap pyrshah ïa ka NPP ka la jur bha ha kine ki san snem ba la leit noh haba ka ïalam ïa ka sorkar Meghalaya Democratic Alliance (MDA).
“Kumno phi khmih lynti ïa ngi ban ïatreilang bad kum kane ka seng kaba don shibun ki jingkynnoh bamsap bad kam shym la don satia ka jingtohkit ïa kine ki jingkynnoh kiba pynhun ïa ki paidbah ka Jylla,” la ong u Bah Ardent.
Haba pynpaw ban sa thaw ïa ka sorkar synrop hapoh ka Jylla, u Bah Ardent u la ong, “Ngin sa peit kiei ki kynhun kiba donkam ïa ka jingkyrshan jong ngi bad ngi ruh ngi la pynkhreh ïa ki katto katne ki kyndon ba ngin buh hakhmat jong kino-kino ki seng kiba kwah ban ïatreilang bad ka VPP”.
Shuh shuh u Bah Ardent u la ong, la ka VPP ka shong ha ka Liang Pyrshah ne ha ka Sorkar ïa mynta hi ym pat lah ban ong “hynrei kam pher ha kano ka liang ngi shong namar ngin ïai bteng ban ïeng skhem ha la ki jong ki nongrim”.
Halor ka jingkynnoh ba ka VPP ka dei kaba la bei tyngka da ka All India Trinamool Congress (AITC), u Bah Ardent u la ong, “Kane ka dei tang ka jingkynnoh ilekshon kaba mih na ka buit jakhlia jong ki seng kiba la suhthied hapoh ka Jylla”.
Haba kylli, u Bah Ardent u la ong, ka jingkyrshan jong ki paidbah ïa ka VPP tang ha ka por ba lyngkot ka pyni shai ba ki la kwah ïa ka jingkylla hapoh ka Jylla.
