Shillong, Lber 03:
U District Election Officer (DEO) ka East Khasi Hills district ka la khot jingïalang ha ka 6 tarik mynta u bnai na ka bynta ban ïakren halor ka jingdawa ka Voice of the People Party (VPP) ban ñiew biang ïa ki vote ha Mylliem konstitwensi.
Katkum ka shithi ba la phah sha u General Secretary ka VPP, Shillong, la ong ba ïa katei ka phang yn ïakren ha ka jingïakynduh ka ban long ha ka 6 tarik Lber ha ka por 12.30 mynsngi.
Kum ban pynkynmaw, ka VPP ka la dawa ban ñiew biang ïa ki vote halor ka jingkynnoh ba ki don ki jingdkoh haba ïadei bad ka jingdon ki vote kiba la thep bad ki vote kiba la ñiew.
Ka VPP ka la pynïakhun ïa ka Kong Aibandaplin F Lyngdoh na Mylliem konstitwensi, ha kaba la pynbna ïa u kyrtong ka Congress u Bah Ronnie V Lyngdoh kum u nongjop ha ka sngi ñiew vote ha ka 2 tarik mynta u bnai.
