Imphal, Lber:
Ki nongïalam bad ki dkhot jong ka Scheduled Tribe Demand Committee of Manipur (STDCM) kiba bun na ki ki dei ki ‘riew kynthei ha ka 2 tarik mynta u bnai ki la la pynlong da ka jingïaïaid paidbah ha ki 2 tylli ki jaka bad pyrshang ruh ban leit ïaid shaduh ka khyrdop jong ka Ïing Dorbar Thaw Aiñ jong ka jylla Manipur kaba don ha ka nongbah Imphal. Ïa ka jingïaïaid paidbah jong ka STDCM la pynsangeh noh da ki bor pulit ha Lamphel Super Market, Imphal, bad ha Wangoi, Imphal West district.
Ïa katei ka jingïaïaid paidbah la pynlong kum shi bynta ban dawa pynrung noh ïa ka kynhun jaitbynriew Meetei/Meitei ha ka thup Scheduled Tribe (ST) jong ka Konstitushon.
Ha katei ka sngi na ka liang ka nong-aiktien jong ka Lamphel Super Market Nupilup (Women’s Vigilante Group) – N Ibemcha Devi ka la ong ba na ka liang ka seng ka kwah ban kyntu ïa ka sorkar jylla ba kan leit ai noh ïa ka kaiphod sha ka Sorkar Pdeng ban pynmih ïa ka rai halor katei ka mat jingdawa. Katei ka nongïalam ka la ïathuh ruh ba watla ki la don katto katne ngut ki MLA kiba la ai ïa ka jingkyrshan halor katei ka jingdawa, pynban na ka liang ka sorkar jylla ka la pynsahteng ïa katei ka kaiphod la bun bun snem mynta.
Ha katei ka jingïalang na ka liang ka dkhot jong ka STDCM – Chaoba Meitei ka la ong ba ka jingpynrung ïa ka kynhun jaitbynriew Meetei/Meitei ha ka thup ST ka dei tang kawei na ki lad ka ban lah ban pynbiang ïa ki lad jingïada na ka bynta ka jaitbynriew Meetei.
