Washington, Lber:
Ka United States ha kane ka kynti ka la ong ba ka long kaba donkam ban iatreilang bad ka India khnang ban ioh ia pyrkhat bad thaw lad kumno ban pynsangeh noh ia ka thma Russia bad Ukraine. Namar na ka liang jong ka US, ka la ong ba ka India ka kham don lad bad kham lah ban ïakren ne pynkohnguh ia ka Russia haba iadei bad ki liang bapher bapher.
Haba iadei bad ka jingkylli ba la buh bad ong ‘Hato ka India ka lah mo ban leh eiei naka bynta ban wanrah jingiasuk hapdeng ka Russia bad Ukraine?’, u Blinken u la ong ba ka India hapoh ka jingialam jong u Myntri Rangbahduh ka India- u Narendra Modi, ka don jingkyrmen shibun ban lah ban wanrah jingiasuk hapdeng ka Russia bad Ukraine namar ba ka India ka long ka paralok ba iajan eh bad ka Russia bad kumta dei sa tang ha ka India, ba ka Russia ka lah ban sngap ia ki jingai jingmut bad jingpynsngewthuh jong ka.
