Dimapur, Lber:
Hadien 60 snem ka la jylla Nagaland sa shisien ka la ïoh biang ïa ki nongmihkhmat kiba dei ki ‘riew kynthei. Ki ar ngut ki ‘riew kynthei kiba la shah jied ban long ki nongmihkhmat jong ka Ïing Dorbar Thaw Aiñ jong ka jylla ki kynthup ïa ka Salhoutuonuo Kruse bad ka Hekani Jakhalu, kiba dei baroh 2 ngut ki kyrtong jong ka seng Nationalist Democratic Progressive Party (NDPP).
Ka Kruse ka la ïoh rah ïa ka nam jop na ka Western Angami Assembly constituency katba ka Jakhalu pat ka la ïoh ïa nam jop na ka Dimapur lll. Halor katei ka nam jop, la ïathuh ba na ka liang u Myntri Rangbah ka Nagaland – Neiphiu Rio bad kumjuh ruh u Myntri Rangbah ka Assam – Himanta Biswa Sarma ki la ai ïa ka jingkhublei kit bok kaba khraw ïa kitei ki 2 ngut ki nongmihkhmat ba thymmai jong ka jylla.
Kat kum ki jingïoh lum jingtip la ïathuh ba ka Jakhalu ka dei ka nongïasaid aiñ bad kumjuh ruh ka nonghikai jong ka skulbah Delhi University, bad kumjuh ruh ka nongseng jong ka YouthNet. Ka la ju ïoh teng ruh ïa ka khusnam ‘Nari Shakti Puraskar’ na u President jong ka ri India ha ka sngi ba la rakhe ïa ka “International Women’s Day” ha Rastrapati Bhavan.
Kat kum ka mat treikam jong ka, la ïathuh ba ka la buh thong hakhmat eh ban trei na ka bynta ka bha ka miat bad ka roi ka par jong ki khynnah samla, ban pynkup bor ïa ki ‘riew kynthei, ban ïakhun na ka bynta ki hok jong ki jaitbynriew rit paid bad kumjuh ruh ban wanrah ïa ka ‘model constituency’ ha ka thaiñ Dimapur III.
Kat kum ki jingïoh lum jingtip la ïahtuh ba ka Rano M Shaiza ka dei tang ma ka ka ‘riew kynthei kaba la shah jied ban llong ka MP Lok Sabha jong ka jylla Nagaland ha u snem 1977 bad ka S Phangnon Konyak pat ka dei ka ‘riew kynthei kaba nyngkong eh ka ban ïoh bat ïa ka shuki Rajya Sabha na ka jylla Nagaland ha u snem 2022.
Kat kum na ka result jong ka ilekshon ïing dorbar thaw aiñ jong ka jylla Nagaland, ka jingïatreilang hapdeng ka seng NDPP bad ka BJP ka la ïoh rah ïa ka nam jop ha ka liang ka jingbun briew ha kaba ka la ïoh jingjop haduh 37 na 60 tylli ki konstitwensi. Ka BJP ka la ïoh rah ïa ka nam jop na ki 12 tylli ki konstitwensi katba ka seng NDPP pat ka la ïoh ïa ka jingjop na ki 25 tylli ki konstitwensi.
