Shillong, Lber 03:
Ki nongïalam ka United Democratic Party (UDP), All India Trinamool Congress (AITC), Indian National Congress, Voice of the People’s Party (VPP), People’s Democratic Front (PDF) bad Hill State People’s Democratic Party (HSPDP) ki la ïakynduhlang ha ka sngi Thohdieng na ka bynta ban thaw Sorkar, hynrei kam shym la poi sha kumba ki thmu namar ka jingïalang ka la kut noh tang ha ka jingïatai kumno ban thawlad khnang ban ïoh thaw ïa ka Sorkar riewlum khlem ka NPP bad ka BJP.
Ki nongïalam jong kine ki seng ki la ïakynduh ha ïing sah u Myntri Sorkar barim uba dei u MLA ka UDP na Amlarem, u Bah Lahkmen Rymbui. Hadien ba la wai ka jingïakynduh lang, ki la ïathuh ba ka jingïakynduh para maki ka long ban tehsong kawei na ka bynta ban skhem ka jingmut bad ïatylli ban thaw ïa ka Sorkar kaba khlem ka NPP bad ka BJP.
Ki nongïalam jong kitei ki seng naduh u Bah Metbah Lyngdoh, Dr. Mukul Sangma, Bah Ardent Basaïawmoit, Bah Ronnie V Lyngdoh bad kiwei ki la pynpaw kajuh ka sur ba ym pat lah ban thaw ïa ka kynhun ne ai kyrteng ïa ka, hynrei ka jingthmu ka long ban pyrshang ki lad ki lynti kumno ban ïoh thaw lang ïa ka Sorkar synrop.
Haba kylli mano ban shimti kum u nongïalam jong kata ka kynhun, bad ban long u Myntri Rangbah, kine ki nongïalam kim shym la lah ban ai ka jubab kaba shai, namar ki la ong ba ïa kane ka phang yn dang donkam ban shong pyrkhat bad ïatai sani biang.
Kine ki nongïalam ki khlem kren shai haba kylli katno ngut ki MLA ki don ïa mynta, bad ki la biang ne em ïa ka jingbun paid ban thaw ïa ka Sorkar.
U President ka HSPDP u Bah KP Pangniang u la ong ba ki ar ngut ki MLA ka HSPDP – Bah Shakliar Warjri (Mawthadraishan) bad Methodious Dkhar (Mawshynrut) – ki donlang bad u ha ka por mynstep ha ka por ba wan sha ka ïing u Bah Lahkmen Rymbui, hynrei hadien katto katne kynta, ki la mih noh bad ki khlem wanphai shuh.
“Ngam tip shuh shano ki don namar ki la jah,” la ong u Bah Pangniang.
Katba na ka liang ka NPP ha ka por janmiet ka la pyntip sha ki lad pathai khubor ba ki 2 ngut ki MLA ka HSPDP lem bad 2 ngut ki MLA shimet ki la ai jingkyrshan ban thaw Sorkar lang.
La ïathuh ba kine ki MLA ki la pynpaw ba wat lada ka UDP bad kiwei ki seng ki kwah ban thaw ïa ka Sorkar ki seng riewlum, hynrei ki donlang kiwei ki seng kum ka TMC bad Congress, bad ym don jingïapher lada thaw Sorkar bad ka NPP kaba dei ka seng na Meghalaya.
