Shillong, Lber 03:
U President ka United Democratic Party (UDP), Bah Metbah Lyngdoh ha ka Sngi Thohdieng u la ong ba ka dei ka jingangnud jong ki seng saiñ pyrthei bapher-bapher ban ïoh noh da ka Sorkar kaba lamkhmat da ka seng ’riewlum.
“Hooid, kane ka dei ka jingkwah jong baroh bad na kata ka daw ki la wan shakhmat, ki la kynjoh sha nga bad ngi la ïalum lang mynta ka sngi,” la ong u Bah Lyngdoh haba jubab halor ka jingpyrshang ka UDP ban thaw ïa ka Sorkar hapoh ka jingïalam ka seng ’riewlum.
“Ha ka jingshisha, la kynjoh ktien ïa nga da baroh ki seng saiñ pyrthei hadien ba la mih ka risol hynnin ka sngi bad ki sngew dei ba kan bha lada ïakynduh lang. Kumta ngi la ïakynduh lang mynta ka sngi bad ka jingmih jong ka jingïalang ka long ba ngi la rai ban pynithuh ïa u briew na kawei-kawei ka seng ban mihkhmat ha ka jingïalang bad ban ïakren aïu ban leh nangne shakhmat,” u la ong haba kren sha ki lad pathai khubor hadien ka jingïalang ha ïingsah jong u Myntri ka tnad kam pohïing barim ka Jylla, Bah Lahkmen Rymbui.
U la ong ruh ba ka kynhun kam pat rai eiei, hynrei ka shu kwah ban ïashong lang khnang ba baroh ki nongmihkhmat kiba shah jied kin ïadonlang.
Haba kylli, u la ong, “Ka ïingdorbar mynta ka don 59 ngut, bad haduh mynne mynsngi kiba la wan ban pynpaw ïa ki jingsngew jong ki, ki don 31 ngut ba kynthup na HSPDP, PDF, VPP, Congress bad TMC bad uwei u kyrtong shimet.”
Haba kylli balei ka seng kam ïatreilang bad ka NPP, u la ong, “Kam dei ba ngim kwah ne ngi kwah, hynrei ka dei ba kiwei-kiwei ki seng ki kwah ban ïashong lang bad ban peit kaei ka ban leh nangne shakhmat.”
Haba ïadei bad ka jingjah jong ki 2 ngut ki MLA ka HSPDP, u Bah Lyngdoh u la ong, “U President ka HSPDP ruh u la ïathuh ha nga shaphang kata bad ngi la buh jingmut ïa kane bad la pyntip sha ngi ba kin sa wan biang mynta ka janmiet.”
Shuh shuh u la bynrap ba ka UDP kum ka seng kan sa ïashong biang ban shim ïa ka rai lada jia ba ka shong ha ka liang pyrshah.
