Lber:
Hadien ba la ïoh ïa ki dkhot ka Ïingdorbar Thawaiñ kaba khatwei ka Jylla, ka la dei sa ka pali jong ki seng saiñ pyrthei ban thaw ïa ka Sorkar kaba thymmai. Ban thaw ïa ka Sorkar, la ka dei kaba synshar tang da kawei ka seng saiñ pyrthei, lane ka Sorkar kaba synrop lang da bun tylli ki seng saiñ pyrthei, donkam ban ïoh ïa ka jingbun paidbah. Ha Meghalaya, ka Ïingdorbar Thawaiñ ka dei kaba don 60 ngut ki dkhot. Na ka bynta ban thaw ïa ka Sorkar, kano-kano ka kynhun ka dei ban don ka jingbun paidbah kaba 31 ngut ki MLA, kata, palat ïa ka marshiteng na ka jingdon ki dkhot.
Ha ki snem kiba la leit, ha ka por ba ka Congress ka dang khlaiñ bad ka ju don ha ka bor synshar, kita ki seng riewlum kum ka United Democratic Party (UDP), Hill State People’s Democratic Party (HSPDP) bad kiwei, ki ju ïatreilang bad ka Congress kaba shah kynnoh ka seng na Rithor, bad kam pher, lada ïalam da u Myntri Rangbah na Rilum Khasi Jaiñtia lane u Myntri Rangbah na Rilum Garo. Ym ju kham don kata ka jingïapher bad jingïakren namar ki Khasi ne Garo ki dei ki nong Meghalaya. Ban sngew ïapher ïa kane, ka dei sa tang lada ïoh noh la kajong ka Jylla hapdeng ki paid Khasi bad ki paid Garo, ha kaba ym donkam shuh ban ïakhlehlang. Ban thaw Sorkar lang hapdeng ki seng saiñ pyrthei, ka dei ka hok jong ki MLA kiba la shahjied bad ka seng jong ki, la ka dei ba kin thaw Sorkar bad ki seng saiñ pyrthei kiba na kane ka Jylla, lane ki seng saiñ pyrthei kiba shah kynnoh kum ki seng na Rithor bad na kiwei ki Jylla.
Ha Meghalaya, ki seng riewlum kim ju ïatylli haba thmu ban thaw Sorkar lang. Lada ym dei ba ïaknieh ban long Myntri Rangbah, ki don da kiwei pat ki daw kum ka jingbym pdiang ïa u nongïalam, nalor ka jingïaknieh ban ïoh long Myntri Sorkar. Ka Congress, BJP, NPP, UDP, TMC bad kiwei pat ki seng saiñ pyrthei, ki dei hi kiba ïalam da ki nongïalam kiba na kane ka Jylla Meghalaya haba ki treikam ha kane ka Jylla. Ka jingdon bun tylli ki seng saiñ pyrthei ka la pynpharia bha ïa ki paidbah ban ai ïa ka rai ha ka por ba thep vote, namar ki paidbah ki ïoh jied bun tylli ki seng bad bun ngut ki kyrtong khamtam eh ha Rilum Khasi Jaiñtia. Haba kwah ban ïoh ka Sorkar kaba skhem, donkam ban don ka seng saiñ pyrthei kaba skhem ka nongrim khnang ba ki paidbah kin shaniah bad ba kin lah ban ai ka rai kaba biang ïa kano ka seng kin phah synshar. Katba ym pat ïoh bun paid tang kawei ka seng ban synshar, kam myntoi ban leh bunkam bad pynkulmar kai ïa ki paidbah khamtam ki duk ki rangli kiba mad jingeh haba mih ki jingpynthut ïa ka kamai kajih kaba man ka sngi.
Dei ban ailad ïa kino kino ki seng kiba kwah ban thaw Sorkar da kaba leit synrop lang namar ha ka synshar paidbah, donkam ban ïoh ïa ka Sorkar jong u paidbah kaba la jied da u paidbah ha ka ilekshon. Ka shong ha kita ki seng saiñ pyrthei kiba ïasngewthuh jingmut ban thaw lang ïa ka Sorkar ne ban pynkhyllem Sorkar, ym da kiwei pat ki kynhun ki bym dei ki seng saiñ pyrthei. Ki paidbah ki dei ban sngewthuh ba ym dei ban shah ïalam bakla ne shongshit tang namarba don kiba pynshit ban myntoi saiñ pyrthei bad ban myntoi shimet.
Ka Jylla ka donkam ban don ka Sorkar kaba la jied da u paidbah ha ka ilekshon kaba dang kham sngewthuh ban ïakren haba mad jingeh, ym da ka jingsynshar President lane ‘President’s Rule’ kaba la shu pynïaid lut da ka Sorkar Pdeng lyngba ka jingpeit jingkhmih jong u Lat ka Jylla. Haba la jied ïa ki MLA ka dei ka kamram jong ki ban thaw ïa ka Sorkar bad ban shim ïa ka rai badno ki sngew ïahap ban ïatreilang.
