Patna, Lber:
U Myntri Rangbah jong ka Bihar u Nitish Kumar la i kumba u la ngat ha ka jingshah thok na ka khubor lamler kaba la saphriang lyngba ka Social Media ha kaba ïadei bad ka jingshah pynïap jong ki nongtrei bar jylla ha kaba la ong ba ki la shah bom beiñ ha Tamil Nadu ha kaba ki la don kumba arngut kiba la duhnoh ïa la ka jingim.
U Nitish Kumar haba u la ïoh khubor halor ka jingshah pynïap jong kitei ki nongbylla u la phah khubor lyngba ka Twitter hynnin ka sngi ha kaba u la pynpaw ïa ka jingsngewkhia mynsiem halor ka jingjia ha Tamil Nadu.
U Myntri Rangbah u la hukum ïa u Chief Secretary bad u DGP ba un ïakren bad ki heh ba dei khmih kiba ha kajuh ka kyrdan ha ka jylla TN bad ban kren ruh halor ka jingshngaiñ jong ki briew kiba trei ha kane ka jylla kiba dei na Bihar.
Ha kaba ïadei bad kane, khyndiat kynta halor kane ka khubor, ki pulit jong ka Tamil Nadu ki la pynshisha da kaba ong ba ki Video ïa kiba la saphriang kylleng ha ka Social Media ha kaba ïadei bad ki nongtrei bar jylla kiba na Bihar kiba la shah pynïap ka dei ka bym shisha, ha kaba ki la mih ki jingkylli ba ha kano ka rukom u Myntri Rangbah ka Bihar u la ngat ha kane ka khubor thok kaba la saphriang kylleng.
Ha ka jingbuh ïa ka Video ha ka Social Media, u DGP jong ka Tamil Nadu u Shailendra Babu u la ong, “Ki la don kumba katto katne ngut ki briew ha Bihar kiba la buh da ki Video kiba la pynsngewthuh bakla ba ki nongtrei bar jylla kiba na Bihar ki la shah thombor ha Tamil Nadu. Ki ar tylli ki Video ïa kiba la saphriang ha ka Social Media ha kaba ïadei bad ka jingjia ka dei kaba bakla bad ka bym dei ka jingjia kaba jia shisha.
Ïa ki jingshisha baroh kiba don ha kane ka Video la pynduh noh ha kaba ki la paw bad la i kumba ki nongbylla kiba sah ha Tamil Nadu ki la shah thombor.”
Kaba kham sngewshutia ka long, ba ïa kane ka mat la rah ha Bihar Assembly ha kaba ka seng BJP ka la kynthoh pyrshah ïa ka sorkar bad dawa ba ka la dei ban ïakren bad ïatyrko nia halor ban pyntikna ban pynbiang ki jingïada bad ai jingshngaiñ ïa ki briew kiba na Bihar kiba trei bad sah ha Tamil Nadu.
Ha ka por ba ka BJP ka la rah ïa kane ka mat ha Assembly, u Nitish bad u Symbud Myntri Rangbah u Tejashwi Yadav kim shym la don hapoh ïingdorbar.
Ka seng BJP ha Bihar ka la nud ruh ban kynthoh jur ïa u Tejashwi uba la leit sha Chennai ha ka sngi Balang ban leit na ka bynta ka jingdon bynta ha ka jingrakhe sngikha jong u Myntri Rangbah jong ka Tamil Nadu u MK Stalin.
