Shillong, Lber 03:
U Myntri Rangbah, u Conrad K Sangma u la leit aiti ïa ka shithi iehnoh kam ha ka sngi Thohdieng kum u Myntri Rangbah ka Jylla ha u Lat ka Jylla, u Phagu Chauhan, ha kaba u la kam ruh ïa ka jingbun paidbah ki MLA ban thaw ïa ka Sorkar kaba thymmai.
U Conrad uba la shahjied biang kum u MLA ka South Tura bad uba dei u National President ka NPP, u la shahjied kum u nongïalam ka Parliamentary Party jong ki MLA ka NPP.
Ka NPP kaba la jop 26 ngut ki MLA, ka la ïoh jingkyrshan na ka BJP kaba don 2 ngut ki MLA, nalor ki 2 ngut ki MLA shimet, bad 2 ngut ki MLA ka HSPDP ban thaw ïa ka Sorkar kaba thymmai.
Na ka liang u Conrad, u la leit rah ruh ïa ka shithi sha u Lat ka Jylla ha ka por janmiet kaba la soi lang da ki 32 ngut ki MLA kum ka jingkyrshan ban thaw ïa ka Sorkar.
Da ka jingkyrshan jong ki MLA shimet bad ki MLA ka HSPDP, kiwei pat ki seng saiñ pyrthei kiba kynthup ïa ka UDP, TMC, Congress, VPP bad kiwei ki seng, kim ïoh shuh ïa ka jingbun paid ban thaw ïa ka Sorkar.
Ha kawei pat ka liang, la ïathuh ba u Conrad u lah ban bamsmai biang kum u Myntri Rangbah ka Jylla ha ka 7 tarik Lber ha kaba u Myntri Rangbahduh ka ri, u Narendra Modi u lah ban donlang ha ka jingbam smai.
Kum ban pynkynmaw, u Conrad u la ïalam ïa ka Sorkar MDA naduh ka 6 tarik Lber, 2018 haduh ka 3 tarik Lber, 2023, ha kaba la donlang ka NPP, UDP, PDF, BJP, HSPDP, NCP, KHNAM bad ki MLA shimet.
