Shillong, Lber 03:
U nongïalam ka TMC, u Dr. Mukul Sangma u la pynpaw ka jingbym sngewtynnad ban wanrah ïa ka jingong ban long Myntri Rangbah da u Khasi ne Garo, bad u la ong ba lada long mano-mano ruh ym dei ban don jingeh, namar ha ki por ba la leit ruh ki don ki Myntri Rangbah ka Jylla kiba la khlad noh kum u Bah B.B Lyngdoh, Bah E.K Mawlong bad Captain W.A Sangma.
Haba ki nongthoh khubor ki buh jingkylli halor ka jingkren ban pynmih Myntri Rangbah da u Khasi, u Dr. Mukul u la ong ba um sngewtynnad ban kren ïa kane ka phang, hynrei um banse ban kren haba la buh jingkylli ïa u.
U la ong ba balei yn shu pynmih jingeh noh lada long Myntri Rangbah u Khasi ne Garo namar ha ki por ba la leit ruh ki Myntri Rangbah ki don kum u Bah B.B Lyngdoh, Bah E.K Mawlong bad Captain W.A Sangma.
U Dr. Mukul u la pynpaw ïa kane hadien ka jingïakynduh lang ki nongïalam jong ki seng saiñ pyrthei kiba kynthup ïa ka UDP, TMC, Congress, VPP bad kiwei kiwei.
U la ong ba ka thong ka long ban donlang kajuh ka thong ban khanglad ïa ka jingbamsap namar ka Jylla ka la shah kynnoh lyngba kawei ka jingkren kaba la mih ha ki lad pathai khubor ba ka Meghalaya ka dei ka Jylla kaba long banyngkong ha ka bamsap.
U Dr. Mukul u la kren ïa kane kum ka jingpynkynmaw ïa ka jingkynnoh u nongïalam ka BJP u Amit Shah uba dei u Myntri Korbar ri, ha kaba ka NPP bad ka BJP mynta ki ïathaw Sorkar lang.
Kumta u Dr. Mukul u la ong ba ym donkam ban khuslai katno ngut ki don ki MLA, hynrei kaba kongsan ka long ka jingshim ïa ka rai kaba skhem ban ïadonlang na ka bynta ban ïakhun pyrshah ïa ka bamsap.
