Bengaluru, Lber:
U Chief Accountant jong ka Bengaluru Water Supply and Sewerage Board (BWSSB), u Prashanth Madal, u la ngat ha ka shrip jong ki heh ka Karnataka Lokayukta katba u dang pdiang ïa ka pisa ba la pynbam kaba long T. 40 lak ha ka sngi Palei.
U Prashanth u la long u khun jong u MLA ba mynta jong ka seng BJP na Channagiri Assembly Constituency, u K Madal Virupakshappa.
Ïa kane ka jingjia la lap ha ka por ba ka liang pyrshah ka la kynthoh jur ïa ka sorkar BJP ha Karnataka da palat 40 per cent ka jingïohnong bad siew ha ki Tender jong ka sorkar.
Kumba la ïathuh ka tyllong khubor, la ong ba u Prashanth u la dawa da kumba T. 80 lak ka pisa na ka bynta ban pynkhuid ïa ki rukom pyntreikam ha kaba ïadei bad ka Tender.
La lap ïa u ha ka por ba u dang kner ïa ka pisa kaba T. 40 lak ha ka jaka treikam jong u bad ïoh ruh ban kurup T. 6 klur na ka ïingsah jong u.
U Prashanth u la don ha kti jong ki pulit ka Lokayukta ha kaba ki la ithuh shai bad pyntikna ïa ki kot donkam. Ïa ka jingmudui la phah ha kaba ïadei bad ka jingmang ïa ki Tender na ka bynta ban pynbiang ïa ki tiar pyndonkam sha ka Karnataka Soaps and Detergents Limited (KSDL).
U kpa jong u Prashath u dei u Chairman jong ka KSDL. Ki heh ba dei khmih kin sa kylli jingkylli bad tohkit ïa u MLA jong ka BJP u Virupakshappa naba ïa ka pisa la shim ha ka kyrteng jong u Chairman jong ka KSDL na ka bynta ka Tender ban pynbiang ïa kitei ki tiar.
