Shillong, Lber:
Ka kynhun ki samla na ka jylla Uttar Pradesh hapoh ka jingkhmih jong ka Ek Bharat Shrestha Bharat Mission’s Yuva Sanga ha ka 2 tarik mynta u bnai ka la leit ban jngoh ïa ka Raj Bhavan, Shillong ban ïakynduh ïa u Lat jong ka jylla Meghalaya, u Phagu Chauhan.
Ha ka jingïalang bad katei ka kynhun jong ki samla, na ka liang u Lat jong ka jylla u la ai jingkren halor bun tylli ki mat kiba ïadei bad ka ‘Ek Bharat Shrestha Bharat Mission’ ha ryngkat ka jingpdiang sngewbha ïa kitei ki samla kiba la wan naduh Uttar Pradesh. Ha ka jingai jingkren jong u Lat, u la pynpaw ïa ka jingsngewkmen kaba khraw bad pyntip ruh ha kitei ki samla ba ka thaiñ shatei lam mihngi jong ka ri India ka dei ka thaiñ kaba riewspah ha ka liang ka riti ka dustur bad kumjuh ruh ha ka liang ka rukom im rukom sah jong ki paidbah nongshong shnong bapher bapher. U la ong ruh ba ka long kaba sngewsih ba bun na ki paidbah nongshong shnong jong ka ri kim shym la don satia ïa ka jingtip kaba kham bniah shaphang ka thaiñ shatei lam mihngi. U la ïathuh ba lyngba ka rynsan ‘YuvaSangam’ kaba la pynsdang hapoh ka jingïalam jong u Myntri Rangbahduh jong ka ri, kan ïarap ïa kiwei kiwei ki nongshong shnong jong ka ri ba kin tip kham bniah shaphang ka riti ka dustur jong ka thaiñ shatei lam mihngi. Kumjuh ki paidbah nongshong shnong jong ka thaiñ shatei lam mihngi kin ïoh ïa ka lad ban tip kham bniah shaphang ki riti ki dustur jong ki nongshong shnong jong ki jylla kiba shabar na ka thaiñ.
Ha ka jingwan jngoh jong kitei ki samla la ïathuh ba kin ïoh lad ban phai khmat sha ki 5 tylli ki mat pdeng jong ka rynsan YuvaSangam – ka Paryatan (Tourism), Parampara (Traditions), Pragati (Development), Prodyogik (Technology) bad ka ParasparSampark (People-to-people connect).
Ïa katei ka kynhun YuvaSangam na ka jylla Uttar Pradesh kaba la ïalam da ka Babasaheb Bhimrao Ambedkar University, Lucknow la pdiang sngewbha da ka skulbah North-Eastern Hill University, Shillong.
