Shillong, Lber 03:
U President ka Voice of the People’s Party (VPP), Bah Ardent M. Basaïawmoit ha ka Sngi Thohdieng u la ong ba ka kynhun ki seng saiñ pyrthei bapher-bapher ka Jylla ba kynthup ïa ka UDP, TMC, PDF, HSPDP, VPP bad Congress ki dang wad ki lad ki lynti ban thaw ïa ka Sorkar kaba khlem ka NPP.
“Kumba phi la ïohi ba kum ki seng saiñ pyrthei ngi ïakynduh mynta ka sngi ban wad ki lad ki lynti ban thaw Sorkar khlem ka NPP,” la ong u Bah Basaïawmoit haba kren sha ki lad pathai khubor hadien ka jingïalang kaba la long ha ïingsah jong u Myntri ka tnad kam pohïing barim ka Jylla, Bah Lahkmen Rymbui.
Haba kdew ba ka kynhun ïa mynta ka dang wad ki lad ki lynti, u la ong, “Ngi dang hap ban pyntikna la kito ki nongmihkhmat ka HSPDP ki la jah shisha ne em…tang ka por ka ban batai. Nga tharai ngi ïa don kumba 28 ngut eiei hangne. Kum ki nongïalam ngi don beit ka jingkyrmen halor kano-kano ka mat.”
La yn khot lang ïa ka BJP ban ïadonlang ha ka kynhun, u la ong ba ha kaba nyngkong ka don ka jingsngew ba ki kwah ban don ka Sorkar ka bym don BJP ne NPP, hynrei kaba nyngkong eh ka long beit ba ka NPP kan ym don ha ka Sorkar.
Halor ka jingjah jong 2 ngut ki MLA ka HSPDP, u la ong, “Ngi dang wad ki lad ki lynti ban thaw ïa ka Sorkar kaba khlem ka NPP.”
Na ka liang u nongïalam ka Congress Legislative Party (CLP), Bah Ronnie V. Lyngdoh u la ong ba ka jingmih na ka jingïalang ka long ba kin dang ïakren namar ka kynhun kam pat shim ïa kano-kano ka rai.
“Kane ka dang dei ka jingïalang kaba nyngkong, lehse ngin dang don shuh ki jingïalang,” u la ong.
U la ong ruh ba baroh ki seng ki la ïawan lang ha kawei ka rynsan ban ïatreilang bad pyntikna ban ïoh ïa ka Sorkar kaba shakri ïa u paidbah bad kaba don ka jingkitkhlieh.
Haba kylli, u la ong, “Ngi don ïa ki nombor.”
Halor ka jingbym don lang ki MLA ka HSPDP ha ka jingïalang, u la ong, “Kine ruh ki dei shi bynta jong kane ka kynhun ïatehlok.”
Shuh shuh na ka liang u MLA ka Congress na Gambegre u Saleng A. Sangma u la bynrap, “Ngi shu don ka jingïakren kumno ban ïatylli lang kawei, ngim pat ïakren ban kam ïa ka jingthaw Sorkar.”
Halor ka jingbym wan jong ki 2 ngut ki MLA ka HSPDP, u la ong, “Ki la wan hangne, tangba ki leit shaei ngam tip, imat ki leit paiñkhana.”
