Beijing, Lber:
U Myntri ka tnat kam bar ri jong ka China, u Qin Gang ha ka jingiakynduh bad u Myntri kam bar ri ka India u S.Jaishankar ha ka Sngi Palei, u la ong ba ka India bad ka China ki donkam ban wanrah ka jingiabeit haba iadei bad ka jingïakynad khappud, khnang ban wanrah ia ka shongsuk- shongsaiñ ha baroh arliang bad kumjuh ruh ban nang pynskhem bad pynkhlaiñ ia ka jingiadei para marjan ri.
Kumta la ong ba u Qin, u la iakynduh markhmat bad u Jaishankar ha katei ka Sngi Palei, da kaba leit ban iadon bynta ha katei ka jingialang jong ki Myntri ka tnat kam bar ri jong kitei ki ri bapher kiba long ki dkhot jong ka kynhun G20 bad ia katei ka jingialang kaba heh bha la pynlong hapoh New Delhi, ka long ruh hadien 34 bnai ka jingïakynad ba khlem sangeh hapdeng ka India bad China haba iadei bad ki kam khappud. U Qin u la shimti ia ka shuki Myntri jong ka tnat kam bar ri ka China, dei ha u Nohprah, ha kaba u la shim bujli noh ia ka jaka jong u Wang Yi.
Namar na ka liang jong ka India, ka la ong ba, ka jingiadei hapdeng ka China bad India kan nym lah ban iaid beit- iaid ryntih da lei-lei ruh, lymda ymdon jingiasuk bad jingiabeit ha ki thaiñ khappud.
Kumjuh ruh na ka liang u Jaishankar, u la ong ba ka jingiadei hapdeng ka India bad China ha kane ka por ka long ka bym biang bad lah ruh ban ong ba ka la dkoh ne ‘anna’ naduh ba la mih ki daw iakajia khappud ha ki snem ba la leit. Namarkata, u la kyntu ia ka China ruh ba kan ialeh katba lah ban wanrah biang noh ia ka shongsuk- shongsaiñ ha kitei ki bynta khappud bad kumjuh ruh ban pynbna biang noh ia ka jingiadei hapdeng ka India bad China ha kine ki sngi ban wan.
Dei ha kane ruh ka bynta ba u Qin u la ong ia u Jaishankar ba ka donkam ia baroh arliang ri ba kin ialeh shitom bad thaw lad kumno ban wanrah ia ka jingiabeit bad jingiasngewthuh jingmut markylliang khnang ban lait na ki kynrum- kynram bad ki jingïakynad kumba long ha kitei ki snem ba la leit.
